Ibra tel lohna World Cup

Sweden-in World Cup khel tur zawnna playoff final-ah Poland 2-0 in an hneh lo a, Qatar-ah Zlatan Ibrahimovic a inlan dawn lo. Chutihrualin Zlatan awm lo mah se khawvel striker ṭha ber Robert Lewandowski a inlan dawn thung.

Silesian Stadium-a inkhel boruak a hot nghal. Goal hmaah Sweden an hlauhawm zawk a, Emil Forsberg goal khung tur Poland keeper Wojciech Szczesny-a'n a dang ṭha hle. First half-ah goal a lut lo.

Second half-ah Swedish midfielder Jesper Karlstrom-a'n Grzegorz Krychowiak lakah penalty a chawi. Minute 49-naah Lewandowski rawn pen chhuakin 'class' zetin goal hmahruai a khung.

Poland tlarhnung tan Sweden forward Alexander Isak a hnawksak zui a, Forsberg erawh goal hmaah a ke a hmui tawk lo. RB Leipzig winger Forsberg hian siphurh sutna hun ṭha nei mah se keeper Szczesny bawkin a dansak.

Sweden defender Marcus Danielson a chesual a, Piotr Zielinski-a'n hun ṭha a bawhpelh lo. Napoli midfielder Zielinski hian ṭha taka lalutin minute 72-naah chak nemnghehna goal a khung.

Janne Andersson-a'n vanneihna beiseiin bench aṭangin player upa leh rawlthar Ibrahimovic leh Anthony Elanga te a luhtir a, danglamna an thlen thei lo. Inkhelh banah Ibrahimovic chuan, "A pawi kan ti takzet. Goal khung turin chance kan insiam a, kan khung thei lo. Tute pawhin World Cup khelh an duh a, kan khel lo tur hi a vanduaithlak," tiin a sawi a, kum 2006 hnuah World Cup a khel tawh lo.

Poland coach Czeslaw Michniewicz chuan, "Ka tan chauh ni loin Poland tan zan duhawm a ni. Kan player ṭhenkhat tan chuan an World Cup hnuhnung ber a ni dawn tih hre tel ila, kan khel tur hi lawmawm lehzual," tiin a sawi.

Kum 52 mi Michniewicz hian kumin aṭangin Poland a enkawl ṭan a, World Cup khel tura an inpettlin avangin bul a ṭan ṭha.