Medvedev tan match khat a la ngai

World number 1 ni leh turin Daniil Medvedev tan match khat chak a la ngai. Russian star hian Miami Open quarterfinal khel turin zaninah Hubert Hurkacz a hmachhawn dawn, a chak a nih chuan ranking sang ber a ni leh ang.

Nimin zing last 16 inkhelah Medvedev hian American player Jenson Brooksby chu 7-5, 6-1 in a hneh a, inelna kal laiah match thum khel tawhin set a la hloh miah lo, a hmaa ding apiang chu an tlawm zel.

Thla hmasa khan Medvedev hian Novak Djokovic nek chhuakin number 1 dinhmun a luah zuai tawh, mahse Indian Wells-ah result a neih ṭhat loh avangin ranking point a hum thei lo a, chuvangin kar khat hnuah hma a hruaina a hloh leh nghal.

Mahse, Miami Open-ah hian Djokovic a inlan ve thei lo a, chuvangin Serbian star hian ranking point hmuh belh tur a nei lo. World number 2 Medvedev tan kawng a inhawn phah a, hlen chhuak tur erawh chuan match khat a la mamawh.

Inkhel dangah Cameron Norrie chu Casper Ruud lakah 6-3, 6-4 in a chak lo. British number 1 hi chawn hliam vangin a buai a, nidanga a match a phak lo. Seeded 10-na Norrie hi eng chena rei nge a chawlh dawn tih erawh hriat a ni rih lo.

Australian tlangval, wildcard hmanga inlan Nick Kyrgios pawh a zinkawng a tawp. Kyrgios hi Italian player Jannik Sinner lakah 7-6(3), 6-3 in a chak lo. Kyrgios hi theihna nei sang a ni a, mahse a nungchang vangin a hlawhtling hleithei ta meuh lo a ni.

German tlangval Alexander Zverev erawh a la chak. World number 4 hian Australian player Thanasi Kokkinakis chu 6-4, 6-4 in a hneh a, a match lehpekah chuan seeded pariatna Casper Ruud a hmachhawn leh ang.