Egypt-in Senegal ngam lo - Salah-a'n World Cup a khel dawn lo
Senegal chuan World Cup playoff-ah Egypt an hneh a, tun dinhmuna mi tam takin khawvela footballer ṭha bera an ngaih Mohamed Salah chuan World Cup a khel dawn lo - Egypt an ṭap.
Thawhlehni zan khan World Cup playoff match second leg-ah team pahnih an intawng a, mualneitu Senegal tan Boulaye Dia chuan minute thumna lekah goal khung mah se goal dang erawh kan hmu zui lo.
First leg-ah Egypt-in 1-0 a hnehna an chan avangin team pahnih hi inkhel pahnih belhkhawmah 1-1 in an inhnehtawk a, extra time-ah pawh goal dang a luh zui loh avangin a chinfelna chu penalty a ni.
Egypt tan Salah chu penalty pet goal lo zingah a tel a, Senegal tan Sadio Mane chuan a chhuih lut thung - penalty-ah 3-1 in Senegal an chak a, World Cup-ah Egypt kan hmu dawn lo.
Thawnthu hlui
February thla mai kha a ni a, AFCON final-ah Senegal leh Egypt chu 0-0 in an inhnehtawk a, penalty-ah 4-2 in Mane telna Senegal an chak a, Salah leh a ṭhiante an ṭap.
Hetihlai hian World Cup playoff-ah team pahnih an intawng dawn tih a chiang tawh a, inkhelh zawhah Salah-a'n dressing room-ah a ṭhiante a fuih a, "Phuba kan la tur a ni," a ti.
Kar hmasa lawk khan team pahnih an intawng ta ngei a, Egypt-in 1-0 in hnehna an chang a, goal awmchhun hi Senegal defender Saliou Ciss-a'n an lama a tihluh ni mah se Salah-a thawhchhuah aṭanga goal a ni.
Salah leh a ṭhianten goal dang khung zui lo mah se goal chhuah loin hun an hmang tluan thei a, away goal rule hman a la nih bawk si avangin dinhmun ṭha tak chungin Senegal an pan.
Mahse maw...
Egypt-in beiseina sang tak nen Senegal an pan a, mahse, an inrin hmain goal an chhuah - minute thumna lekah freekick hlauhawm tak aṭanga ball kal an chingfel thei lo a, Egypt tlarhnung ball tauh chhuah chu Boulaye Dia chuan a lo hlap let.
Villarreal forward goal shot hian Egypt defender Hamdi Fathi a per a, goal-ah a lut - Senegal-in beisei aia hmain si phurh an sut a, mahse, away goal rule hman a nih miau avangin tlarhnung ngaihthah a thiang lo.
Hetihrual hian goal nawr na tura beisei Egypt zawkin an hlauhthawng em ni chu aw, tih tur a ni a, an nawr na tawk lo a, hma taka goal an chhuah chungin a tirah an game plan rin an thlang a, tlarhnungah an inremphui tlat.
Heti chung hian team ṭha zawk Senegal chu chance nei ṭha zawk an ni a, Ismaïla Sarr chuan chance duhawm vawi hnih a nei - Watford winger hian Egypt keeper Mohammed El Shenawy chiah a hmachhawn chungin a khung thei lo a, extra time-a Mane-a ball pek duhawm chu engmah loah a chantir bawk.
Salah a ṭap
AFCON final penalty-a Senegal-in Egypt an hneh ṭum khan a tawp khar nana penalty pet tumtu Salah-a'n a pet ve hman lo a, a pet ve hmain Senegal an chak. Egypt player thiam ber leh penalty pet ngun berin a tawp a nghak kher hian sawisel a hlawh a, a pet hmasa ber lo chu an dem.
Egypt-in an ngaihdan an thlak a, penalty shootout-ah ram tana pen chhuak hmasa ber turin Salah an dah. Senegal-in an pet hmasa zawk a, captain Kalidou Koulibaly chuan bar a rawn pet per avangin Egypt dinhmun a ṭha hle.
Mikhual team tan Salah a lo pen chhuak a, mahse, Liverpool forward hian bar chungah a thlawh! Mahse, Senegal tan Saliou Ciss chuan a pet goal lo ve leh a, Egypt dinhmun bawk a ṭha nawn - mahse, Ahmed Sayed chuan a hlah ve leh.
Team pahnih tana penalty pet hmasatu paliin an chhuih goal lo vek a, Senegal an insiam ṭha - Sarr leh Dieng ten an rawn pet goal a, Egypt tan Amr El Solia-a'n a chhuih luh laiin Mostafa Mohamed chuan a pet goal ve lo.
Penalty a pet dawnin Salah chu laser hmangin Senegal fan-ten an chhun.
A pawi zo ta
Mostafa-a'n penalty a hlah hnuah Senegal tan Mane a rawn pen chhuak a, Liverpool forward hian harsatna nei loin a khung - Egypt an tla a, Mane-a'n Reds tana a khelhpui Salah a ṭahtir leh ta.
Senegal fan-ten penalty pet a nih dawn hian laser hring hmangin Egypt player-te an chhun a, penalty pet dawn apianga a pet turte an chhun bakah, Egypt goalkeeper El Shenawy pawh penalty a hmachhawn apiangin an lo chhun.
Egypt-in chak loh chhuanlam zawng duh se, laser hmanga inchhun hi chhuanlam a tling a, laser hmanga a mit an chhun khalh zingah Salah pawh a tel.
African player awm tawh zinga thiam ber anga tam takin an ngaih Salah hi khelmuala tlan lut Senegal fans leh, pawn lama awmten an beih avangin venhimna hnuaiah khelmual aṭanga lakchhuah a ngai hial bawk.
Egyptian FA an lawm lo
Senegal laka an tlawm hnuah Egyptian Football Association-in an lawm lohna an sawi a, Egyptian FA chuan Senegal fan-ten chi inthliarna lam hawi leh mawi lo tak taka an beih thu an sawi. Egyptian FA -in an tarlan danin Senegal fan-te hian Egypt player-te chu warm-up laiin bottle leh lung hmangtein an vawm a, stadium an pan laiin team bus-in beih a tawk bawk.
Senegal fan-te chet dan hi Egyptian FA chuan an instagram account lamah an pholang a, Egypt FA chuan, "Senegal fan-te khan chi inthliarna lam hawiin kan player-te chu an bei a, a bik takin Salah chuan beihna hi a tawk nasa lehzual a ni.
"Warm-up laiin lung leh bottle hmangin kan player-te vawm an ni bawk a, kan bus an vawm avangin hliam leh bus darthlalang chhiate pawh a awm nual a ni," an ti a, an lawm lo hle.
CAF World Cup Playoff
March 25, Zirtawpni - First Leg
Congo DR 1 - 1 Morocco
CON: Yoane Wissa 12'
MOR: Tarik Tissoudali 76'
Cameroon 0 - 1 Algeria
ALG: Islam Slimani 40'
Mali 0 - 1 Tunisia
TUN: Moussa Sissako 36' (OG)
Egypt 1 - 0 Senegal
EGY: Saliou Ciss 4' (OG)
Ghana 0 - 0 Nigeria
March 29, Thawhlehni Zan
Senegal 1 - 0 Egypt
SEN: Boulaye Dia 4'
*Penalty-ah 3-1 in Senegal an chak
Penalty pet dan
Senegal
Kalidou Koulibaly X
Saliou Ciss X
Ismaïla Sarr G
Bamba Dieng G
Sadio Mané G
Egypt
Mohamed Salah X
Ahmed Sayed X
Amr El Solia G
Mostafa Mohamed X
Nigeria 1 - 1 Ghana
NIG: William Troost-Ekong 22' (P)
GHA: Thomas Partey 10'
*Inhnehtawk mah se khualmuala goal khung vangin Ghana an tlang.
Algeria 1 - 2 Cameroon
ALG: Ahmed Touba 118'
CAM: Eric Maxim Choupo-Moting 22'; Karl Toko Ekambi 120'
*Goal hnih khungtu Cameroon chu away goal rule hmangina an tlang.
Morocco 4 - 1 Congo DR
MOR: Azzedine Ounahi 21', 54'; Hakimi 69'; Tarik Tissoudali 45'; Achraf Hakimi 69'
CON: Ben Malango 77'
Tunisia 0 - 0 Mali
*Agg-ah 1-0 in Tunisia an chak