World Cup khel tur a hriat kim ṭep

Nimin thleng khan FIFA World Cup khel turin ram 27 an tling tawh a, tukin zingah pahnih an tlin belh leh ang. Kumin World Cup hi November 21 leh December 18 inkar hian Qatar-ah khelh a ni dawn. Tie draw hi April 1, Zirtawpni tlai dar 4:00 hian Doha-ah neih a ni ang.

Ram 27
Asia aṭangin inelna thlengtu Qatar bakah Iran, Japan, Saudi Arabia leh South Korea te an tling tawh. Australia leh United Arab Emirates ten inter continental playoff khel tur an zawng dawn a, heta chak zawk hian South America pangana Peru an hmachhawn ang.

Africa-in quota panga an nei a; Cameroon, Ghana, Morocco, Senegal leh Tunisia te an tling tawh. North, Central American & Caribbean aṭangin Canada chiah an la tling. Tukin zingah team dang pahnih an hriat dawn a, United States leh Mexico ten Canada hnung an zui thei ang.

Oceania-in quota an nei ve lo. Nizana Solomon Islands leh New Zealand inkhela chak zawkin CONCACAF aṭanga palina an hmachhawn dawn a, Costa Rica ni turah a ngaih theih.

South America aṭangin Argentina, Brazil, Ecuador leh Uruguay te an tling. Europe aṭangin Belgium, Croatia, Denmark, England, France, Germany, Netherlands, Poland, Portugal, Serbia, Spain leh Switzerland te an tling tawh a, Ukraine leh Russia buaina avangin pakhat dang hi a la hriat loh.

Hmunruak pakhat hi Wales, Scotland leh Ukraine aṭangin team pakhat an tling dawn. Wales hian playoff final an lut tawh a, Scotland leh Ukraine hian playoff semifinal an khelh a la ngai.

Tie Draw chu
Tie draw-ah hian team 32 chu pot paliah pariat zelin an dah ang. Seeded hi March thla FIFA ranking hmanga siam a ni dawn. Pot A-ah inelna thlengtu Qatar bakah seeded sang pasarih an awm ang.

Europe aṭanga playoff khelh hmabak leh intercontinental playoff aṭanga tling turte chu Pot D-ah an awm dawn. Pot khata awmte hi group khatah a awm thei lo. Europe tih loh zawng khawmualpui dang ho chu group khatah pakhat chauh an awm thei a, Europe pawh hi group khatah pahnih bak an awm thei lo.