Chile leh Colombia tan hmun a awm lo ; Playoff khel turin Peru an tling thung
South America aṭanga World Cup khel turin team pali an tling tawh a, playoff khel tur pawh a chiang ta. Peru chu inter-confederation playoff khel turin an tling. Chile leh Colombia tan Qatar panna ticket a awm ve ta lo a ni.
Peru hian playoff-ah chuan Asian ram an tum dawn. United Arab Emirates leh Australia inkhela chak zawn nen an inhmachhawn dawn a, team ṭha an la hmachhawn dawn avang hian World Cup an khel ngei ang tih erawh 100%-a sawi ngam a la ni rih lo.
A tawpah Peru
South America ram 10 inel zingah Brazil, Argentina, Uruguay leh Ecuador ten match hnuhnung ber khelh hmain an dinhmun an chingfel. Brazil leh Argentina phei chu an tlinna a rei tawh, ram dang aiin match khatin an la khel tlem zui.
Nimin zing inkhelah Peru hi chak lo ni se playoff khel phak lo thei an la ni. Mahse, Gianluca Lapadula leh Yoshimar Yotun te goal hmangin an mikhual Paraguay chu 2-0 in an hneh a, midang result ngaihchan tel ngai loin an tlang.
Peru coach Ricardo Gareca chuan, "Qualifier kan khelh ṭan dan a ropui lo, mahse kan thawh leh dan erawh a chhuanawm hle. Contract thar ka ziah khan, ka thil tum hmasa chu World Cup khelh phak a ni, tunah chuan hna hmasa kan hlen chhuak.
"Player leh fans ka lawmpui a, min thlawp ṭha em emtu Peru mipuite ka lawmpui takzet bawk. Chutihrualin hna kan la zo fel lo, hmabak hautak tak hmachhawn tur erawh chuan kan inpeih tih a chiang," a ti a, playoff paltlang ngei a inbeisei.
Mangṭha mai u
Chile hian player ṭha tak tak an nei, khawmualpui bik inelna Copa America-ah chuan an hlawhtling. Mahse, Alexis Sanchez, Arturo Vidal, Charles Aranguiz, Claudio Bravo, Mauricio Isla, Gary Medel leh Eduardo Vargas te nei chungin World Cup an khel dawn lo.
A zawnin World Cup an khel dawn lo tihna a ni a, an player ṭhate hi uaithla lam an nih tawh avangin football inelna lianah kan hmel kan hmuh a rinawm ta lo. Qualifier match hnuhnung berah midang result ngaichang chungin an inlan a, mahse anmahni ber hi Uruguay lakah 2-0 in an tlawm.
Chile head coach Martin Lasarte chuan, "Ka naute hian hmabak an la nei, anmahni aṭang hian an theihna zawng zawng an sawr chhuak lo deuh niah ka ngai," tiin a naute khelh danah a lawm lo a, beiseina an neih pawh anmahni ngeiin an chhawm nung zo lo.
Colombia pawhin Peru chetsual an chang a, an chunga mite chesual ni se la chuan an tan kawng a la inhawng thei. James Rodriguez-a goal hmangin Venezuela 1-0 in an hneh a, mahse Peru an chetsual loh avangin Colombia tan kawng a inhawng ta lo a ni.
Record thar
Tling chiang tawh mahse Brazil-in chawlh zai an rel lo. Tite naute hian inkhelh harsatna hmunah Bolivia 4-0 in an luhchhuah. World champion vawi nga ni tawh tan Lucas Paqueta-a'n goal hnih a khung a, forward Richarlison leh Bruno Guimaraes ten an khung bawk.
Tite-a naute hian qualifier match 17 an khelh aṭangin vawi 14 hnehna an chang a, vawi thum an inhnehtawk. Point 45 zet hmuin South America World Cup qualifier khelh tawh china point hmu hnem ber record an siam.
Tun hma deuhin Marcelo Bielsa enkawl Argentina chuan 2002 khan point 43 an lo hmu tawh, tunah chuan Brazil hian match khata khel tlem chungin record hi an khum. Brazil leh Argentina inkhel tur a ṭhulh tak hi an khelh leh hun tur sawi a la ni lo.
Nimin zing inkhel dangah Lionel Messi awmna Argentina chu Ecuador nen 1-1 in an inhnehtawk. World champion vawi hnih ni tawh hi an kaltluang rei ta viau, an match hnuhnung 31 zetah tlawm an nei lo - inrintawkna sang tak nen World Cup an khel ang.