Giroud-a'n Henry a hnaih

France chuan friendly match-ah South Africa chu 5-0 in an sawp a, Kylian Mbappe chuan goal hnih khung mah se goal khat khungtu Olivier Giroud chanchinin sawi zui a hlawh zawk.

Les Bleus tan AS Monaco striker Wissam Ben Yedder leh Arsenal aṭanga Marseille-a loan-a khel Matteo Guendouzi te chuan goal khat ve ve an khung bawk a, Mbappe goal hnihna hi penalty aṭanga a chhuih luh a ni.

Kum 35 mi Giroud hian France tan match 112-ah goal 48 ngawt a khung tling ta a, France tana goal khung hnem ber Thierry Henry chuan match 123-ah goal 51 a khung a, AC Milan striker Giroud hian goal thum chiahin a phak tawh lo.

South Africa-in France an ngam loh tehlul nen right back Khuliso Mudau chu minute 84-naah hnawhchhuah a ni a, Mudau hnawhchhuah hnuah hian Guendouzi chuan goal khat a khung ve leh a ni.

Hetihlai hian World Cup khel tura tling zo lo pahnih inkhelah Italy chuan 3-2 in Turkey an hneh a, Cengiz Under chuan minute lina lekah Turkey tan goal hmahruai khung mah se Italy-in Bryan Cristante leh Giacomo Raspadori hmangin an chhanglet. Turkey tana minute 83-naa Serdar Dursun-a goal tauh luhin awmzia a nei tawh lo.