Semifinal-ah Osaka a lut

Naomi Osaka chuan harsatna hrang hrang karah hmalam a pan zel. Japanese star hian nimin zing khan American player Danielle Collins chu straight set hmanga hnehin Miami Open semifinal a lut.

Grand Slam vawi li champion tawh Osaka hian tun tournament-ah set a la hloh miah lo, a khingpui Collins lakah vawi 13 zet aces a vaw chhuak a, darkar khat chhungin 6-2, 6-1 in hnehna a chang.

Australian Open finalist Collins hi a nghawng a hliam a, inhnukdawk chiah lo mah se inkhelh chhung zawngin 100% chu a phak lo tih a lang. A inkhelh thiamna hmun hard court ni mah se tho chhuak turin chakna a nei lo.

Osaka hian a match lehpekah chuan Belinda Bencic a hmachhawn leh ang. Nikuma rilru lam harsatna a tawh hnuah Osaka hian tournament a khelh leh china a thlen san ber ṭum a ni a, hlawhtlin a duhna a sang zual khawp ang.

Kum 24 mi Osaka chuan, "Tennis aṭangin ka chawl zuai, a chhan chu harsatna ka tawh vang a ni. Chumi hnu lamah tun ṭum hi zana match ka khelh lehna hmasa ber a ni a, min thlawptu fans an ṭhat em em avangin ka lawm," a ti.

Inkhel dangah Swit-zerland nula Bencic hian Daria Saville chu 6-1, 6-2 in a lo sawp ve bawk. Bencic hi Olympic gold medal vaw chhuak thei a nih avangin Osaka tan paltlang a harsa dawn. Olympic-ah khan Osaka hi inlan ve mah se a hlawhtling zo lo a ni.