Zanin dar 9:30-ah FIFA World Cup draw
Khawvel football inelna ngaihhlut ber FIFA World Cup 2022 draw chu zanin dar 9:30 hian Doha Exhibition and Convention Center (DECC), Qatar-ah neih a ni dawn. Ram 32 tling tur zinga 29 a hriat tawh a, European champion Italy chu tel pha lo langsar an ni.
Draw hi a hmunah mi 2000 velin an chhim dawn. United States hmeichhe player ropui Carli Lloyd, England international hlui Jermaine Jenas leh International Sports Anchor Samantha Johnson ten draw hi an buaipui dawn a, Cafu (Brazil), Lothar Matthaus (Germany), Adel Ahmed MalAllah (Qatar), Ali Daei (IR Iran), Bora Milutinovic (Serbia/Mexico), Jay-Jay Okocha (Nigeria), Rabah Madjer (Algeria) leh Tim Cahill (Australia) ten an pui bawk ang.
A kalphung
Tie draw-ah hian team 32 chu pot paliah pariat zelin an dah ang. Seeded hi March thla FIFA ranking hmanga siam tur a ni a, nimin khan ranking thar a chhuak. Brazil-in hun rei tak pakhatna dinhmun luah tawhtu Belgium an luahlan a, chutihrualin Pot A-a awm tur seeded team erawh a danglam phah lo.
Pot A-ah hian inelna thlengtu Qatar bakah seeded sang pasarih an awm ang. Europe aṭanga playoff khelh hmabak leh intercontinental playoff aṭanga tling turte chu Pot D-ah an awm dawn. Pot khata awm te hi group khatah an awm thei lo. Europe tih loh zawng khawmualpui dang ho chu group khatah pakhat chauh an awm thei a, Europe pawh hi group khatah pahnih bak an awm thei lo.
Pot hrang hrang
FIFA ranking thar a chhuak a, pot hrang hranga team awm dan tur a chiang ta bawk. Pot A-ah inelna thlengtu Qatar bakah Qatar, Brazil, Belgium, France, Argentina, England, Spain leh Portugal te an awm a, heng ram pariatte hi group khatah an awm thei lo.
Pot B-ah Mexico, Netherlands, Denmark, Germany, Uruguay, Switzerland, USA leh Croatia te an awm ang a, pot C-ah Senegal, Iran, Japan, Morocco, Serbia, Poland, South Korea leh Tunisia te an awm thung. Pot D-ah hian team panga Cameroon, Canada, Ecuador, Saudi Arabia leh Ghana te a chiang tawh a, team pathum dang hi la zawn leh tur a ni.
Russia-in Ukraine an run avangin Ukraine telna playoff la khelh theih a la ni lo. Europe aṭanga hmun ruak pakhat hi Wales, Scotland leh Ukraine te zinga pakhatin an hnawhkhat ang. Inter continental playoff pahnih khelh tur a awm. South America-a pangana Peru leh Asia ram aṭanga pangana te an inkhel dawn. Asia aiawh tur hi UAE leh Australia ten an la zawng dawn.
Inter continental playoff khel tur dang erawh a chiang tawh. CONCACAF aṭanga palina Costa Rica-in Oceania champion New Zealand a hmachhawn ang. Playoff khel tur team zawng hi ranking la en theih a nih loh avangin seeded an ni pha lo a, pot D-ah vek dah an ni ang.
Thil thlen theih dan
Group khatah hian Europe aṭangin ram pahnih an awm kawp thei a, pahnih aia tam a awm thei lo. Khawmualpui dang zawng ram chu group khatah an awm ho thei lo thung. Chumi awmzia chu England, Netherlands leh Poland te hi pot hran ṭheuhah awm vek mah se group khatah an vai hian an awm ho thei lo. Chutiang chiah chuan South America ram pahnih Brazil leh Uruguay te hi pot hranah awm mah se group khatah dah dun theih an ni lo.
World Cup champion turin inpuahchahna ṭha a pawimawh a, chutihrualin fixtures fuh a pawimawh tel bawk. FIFA ranking hmangin seeded siam thlap ni mah se group vanduai bik 'group of death' tia hming an vuah ang kha a awmna chance a sang hle. Team tin an intluk rual a, African champion Senegal meuh pawh pot C-ah an awm chauh. Sadio Mane telna team hi an vanduai chuan Brazil, Germany leh Canada te nen pawh awm ho thei an ni.
Khawvel mit fukna tur Lionel Messi leh Cristiano Ronaldo te telna ram Argetina leh Portugal erawh pot A-ah an awm ve ve a, tie draw awm hma hauhin group stage bikah chuan Messi leh Ronaldo te an inhmachhawn dawn lo tih a chiang.