Aizawl, Lunglei leh Champhai club-ten semifinal an lut

1st April, 2022

GIG Motors 20th MFA Cup-ah Aizawl club Kanan FC, Lunglei club Chanmari FC leh Champhai club FC Vengthlang North ten semifinal an lut. Tukin zing dar 7:00 hian Electric FC leh Siaha FC te an inkhel ang a, group C aṭanga semifinal khel tur a hriat theih ang.

MFA Cup hi Saitual DFA-in a thleng a, Keifang Centenary Football Ground-ah kheh a ni. Semifinal hi April 2, Inrinniah khelh a ni ang a, April 4, Thawhṭanniah final khelh a ni ang.

Kanan an vannei
Aizawl champion Kanan FC-in an match hmasa berah Saitual FC hmachhawnin point khat an hlawh chhuak a, a suttu zawk an ni. Saitual hi Kolasib club Saidan nen an inhnehtawk a, nimina Saitual leh Kanan inkhel a pawimawh hle.

Chawngthansanga hoten bul an ṭan ṭha a, hma takin goal hnih a khung. Amaherawhchu Saidan FC-in second half ṭantirhah an sut a, 2-2 a ni. Heti hian inkhel tawp ta se Kanan leh Saitual an tla ang a, Saidan FC-in semifinal an lut thung dawn. A tawpah erawh Aizawl club danglamna a lang a, 4-3 in an chak. Inelna thlengtu Saitual leh Kolasib an tla.

Champhai leh Lunglei
Champhai club FC Veng-thlang North-in harsatna an tawk lo. Match hmasa berah Mamit club Luangpawl FC 3-1 in an hneh a, nimin khan Lawngtlai FC 3-0 a hneh lehin point ruk hmu chungin semifinal an lut.

Lunglei club Chanmari FC pawhin awlsam takin group stage an paltlang. Chanmari FC hian Khawzawl FC ṭum hnih hmachhawnin 5-1 in match hmasa zawkah an hneh a, nimin khan 3-2 in an hneh nawn. Champhai leh Lunglei club te hi semifinal-ah an inhmachhawn dawn a, final kalkawng a harsa chiah ang.

Serchhip nge Siaha?
FC Serchhip Kawnpuiin match hmasa berah Hnahthial club Electric FC chu 5-4 in an hneh a, niminah Siaha FC hneh se semifinal an lut ang. Amaherawhchu Serchhip leh Siaha te hi 1-1 in an inhnehtawk a, group C aṭanga semifinal lut tur la hriat loh mah se Hnahthial club an tla.

Siaha hian tukinah Hnahthial club an hmachhawn dawn a, semifinal lut turin goal hnih tala chak a ṭul dawn. Serchhip erawh tla tawh Electric FC kutah an awm dawn a, nuam sain an awm thei lo ang.