Rei lote atan a rawn lang a, a liam leh mai si...

A vanglai tak a ni a, dinhmun duhawm takah a ding bawk - hmabak eng tak neiin midang chunga leng a ni. Mahse, a hmabaka chawimawina leh ropuina tawng buak mai theih tur nia langte chu a hnuchhawn a, khawvel barakhaihin tennis a chawlhsan thut mai si.

Hmeichhe tennis world number 1 Ashleigh Barty chuan tun hnai khan inkhelh a chawlhsan thu a puang, kum 25 mi chauh a la ni! Australian nula thutlukna hian khawvel a barakhaih a, a hma hunah eng nge a tih dawn tih chu zawhna langsar a ni nghal bawk.

Wimbledon champion nih hi mellung pawimawh bik ni ta se, an ram Australia ngeia Grand Slam a chawi leh khan a duhthusam a ti kim ta mai em ni ang? Eng vanga vanglai taka chawl mai nge maw a nih le, hliam na a nei pawh a ni si lo.

Mangṭha u...
Barty chuan, "Phurna ka nei lo, ka rilrua awm hi eng ber nge pawh sawifiah a harsa," a ti. Barty hi hripui leng hlau tak zinga mi a ni a, hri leng a hlauh vang hian ram danga inkhel tur pawhin a zin chhuak ngai meuh lo tluk a ni.

Hri leng inkaihhruaina kawngah Australia hi an kal fawr hle a, ram dang aṭanga an zin haw hnuah khung hran an la ngai ṭhin, hei thil hian infiammi tam tak nunah nghawng a nei - Barty nunah pawh hian nghawng a neih ngei a rinawm.

Tun hma deuh khan Barty hian rilru lama harsatna a lo nei tawh. Kum 18 mi lek a nih lai khan zin chhuah hi hrehawm a ti ṭhin a, an chenna in a ngaih avangin a rilru a hrehawm a, chu chuan a nunah nghawng pawh a nei tel.

Lungleng mi a nih avang hian zin hi nuam a ti lo, season hmasa khan a inkhel hnem - thla 12 zinga thla ruk zet chu zin nan hun a hmang a, hei hian a nunphung pawh a ti buai, chhungkua leh ṭhiante ngai ṭhintu tan chuan rei tak a ni.

Barty chuan, "Ka ṭhian leh chhungte kianga hun hman ka duh, engtik lai pawhin midang tan hun neih tam hi chu ka duhdan a ni ṭhin. A nihna tak sawi chuan, tunah hian inkhelh châkna ka nei rih lo a ni," tiin a sawi a, chhungkua a dah pawimawh hle.

Mi bik chu
Brookwater, Queensland-a cheng nula hi infiammi ni tura piang chu a ni, tennis a luhchilh chinah pawh player danglam tak a ni. Grand Slam pali zinga pathum - Australian Open, French Open leh Wimbledon title a la hman, a hmabak chu US Open chauh a ni.

Kumin January thla khan Australian Open nomawi a chawi, an ramah hian kum 44 hnuah tualchhung player champion leh thei hmasa ber a ni hial. Ram mipui ten hun rei tak an lo nghah tawh chu a tih hlawhtlinsak.

Chawlhkar 114 chhung zet a zawnin number 1 dinhmun hi a luah a, ani aia a zawna number 1 ni rei thei chu Steffi Graf, Serena Williams (186 weeks) bakah Martina Navratilova (156) te chiah an ni.

Barty hi number 1 ni chungin a chawl a, chawl lo se la chuan number 1 a la ni chhunzawm zel dawn. A chawlh laia amah hnaih bertu Iga Swiatek aiin point 2240 zetin a sang fal - Grand Slam champion tan point 2000 a ni a, an inkar hi a la zau tawk hle.

Chawl loin khel tluang ta se, hliam leh harsatna in a tlak buak a nih ngawt loh chuan number 1 ni chungin season a hman tluan theih a rinawm hial. A zawna number 1 ni rei ber nih theihna remchang a neih chu a kalsan tihna a ni, player tam tak duhthusam a kalsan!

A mak lo
Barty-i coach Craig Tyzze chuan thil thleng hian a barakhaih loh thu a sawi. Tyzzer chuan, "Ash-i hi a duhdanin a kal, a chawlh thu a sawi hian min barakhaih hran lo," tiin a sawi a, a coach hi hrilh lawk hran lo mah se a mizia aṭangin a lo hrethiam viau.

Tyzzer chuan sawi zawmin, "Ram mipui tan Aussie Open nomawi a chawi a, hmabak a nei tawh hran loah a inngai a nih pawhin ka dem lo. Mi tam takin thlen chin leh thlen châk kan nei, ani chuan a duhthusam a ti puitling tawh," tiin a sawi.

Barty hian a pasal hual Gary Kissik nen inneih an tum thu a sawi lang zauh tawh a, inneih ni tur pawh an tifel tawh. Mahse, a hun leh ni tak erawh tarlan a ni lo thung a, hun rei vak lo hnuah chuan nu a ni dawn - pasal neih hi a chawlh chhan ni thei tur zinga mi a ni bawk.

Media a hmachhawn ṭumin, tennis huangah i lo kir leh ang em? tih zawhna chhangin Barty chuan, "Ka hre lo le, mahse thil theih loh erawh a awm lo, ngun taka ngaihtuah hmasak phawt erawh a ngai ang," a ti a, kir tawh miah lo tur anga dah ngawt theih chu a la ni lo.

Barty hi lo kir leh ta se, US Open champion a nih theih chuan Margaret Court, Billie Jean King, Chris Evert, Martina Navratilova, Steffi Graf, Serena Williams leh Maria Sharapova te hnung zuia Grand Slam champion kim thei a ni ang, mahse hei chu beiseina chauh a ni.

Hmanah pawh
Barty thil tih ang deuh hi tun hmain a lo thleng tawh. Kum 2008 May thla khan, khatih laia world number 1 Justin Henin chuan tennis a lo chawlhsan thut tawh a, a chawlh hmasak hian kum 25 mi chauh a ni ve bawk.

Henin-i chawlh hi French Open khelh hma kar hnih chauh a awm tawhah a ni. Belgian star hi French Open hnuhnung panga zinga vawi li champion thei a nih avangin a chawl khan mak tih a hlawh zual hle.

A chawlh aṭanga thla 16 hnua Henin hi a lo kir leh a, mahse a kir leh kumah hian a vawi hnih nan tennis a chawlhsan leh nghal. Henin ang bawka Belgian player Kim Clijsters pawh 2007 khan kum 23 mi chauh ni chungin a lo chawl tawh.

Season hnih a chawlh hnuah Clijsters hi a inkhel leh a, mahse beisei a phak tawh lo. A hnu lamah pawh fa neih vangin a chawl a, lo kir leh ṭhin mah se world number 1 nih laia a boruak ang kha chu a nei thei tawh lo, chawl tura thutlukna a siam hmasak ber khan a ṭha lo zawng zelin a nghawng.

Tun hma lama player ṭha chawl tawhte thlir chuan, chawlh hnua inkhelh leh hi thil awlsam a ni lo. Barty pawh a lo kir a nih pawhin a awlsam bik lo ang, chutih rualin tennis bakah cricket, golf leh Australian Rules football khel thiam a ni miau a, midang nen huang khata dah a rem lo.