Hmeichhe football a vul - Nou Camp a khat!
Mipui 91,553 chu tam tak an ni - district khawpui pakhat dinpui hial tham an ni! Chutiang taka mihring tam chuan Nilaini zan khan Nou Camp-ah hmeichhe inkhel an en.
Ni e, i chhiar dik e - hmeichhe football-in khawvel hmelhriat a hlawh ṭan zel a, Nilaini zan inkhel pawh hi a boruak a lian hle. Barcelona hmeichhe team chuan Real Madrid hmeichhe team an lo mikhual a, inkhel entu mi 91,553 chu hmeichhe football a inkhel entu tam ber record thar a ni.
Hmeichhe El Clasico-ah hian 5-2 in Barcelona an chak a, Women's Champions League quarterfinal second leg a ni - inkhel hmasa nena belhkhawmin Barcelona hi 8-3 in an chak a, an tlang.
Nilaini Zan quarterfinal inkhel dangah Paris Saint-Germain leh FC Bayern Münich chu 2-2 in an inhnehtawk a, first leg-a 2-1 a lo chak tawh PSG chu 4-3 in a tlang zawkah an ṭang.
El Clasico
Barcelona leh Real Madrid inkhel a nih tawh chuan eng level pawh ni se ngaihven a hlawh ṭhin a, Nilaini zana hmeichhe team inkhel pawhin ngaihven a hlawh hle - beisei ang ngeiin inkhel a hmuhnawm bawk.
Catalan club tan Maria Pilar Leon chuan minute riatna lekah goal hmahruai a khung a, mahse, Real-in rang takin an chhanglet.
Irene Paredes handball vanga an penalty hmuh chu Olga Carmona chuan goal-ah chantirin si phurh a sut ṭhen a, Claudia Zornoza chuan goal ropui a khung bawk.
Mahse, Barca an hnual rei lo - Aitana Bonmati, Claudia Pina, Alexia Putellas leh Caroline Graham Hansen te chuan second half-ah goal khat ṭheuh an khung a, 5-2 in an chak.
Record chu
Barcelona hmeichhe team hian an home game tam zawk club training centre, Johan Cruyff Stadium-ah an khel ṭhin a, Spanish top flight league-ah match tina entu mi 2,938 zel nei ang an ni a, anni aia entu nei ṭha an awm lo.
El Clasico atan Nou Camp-a inkhel turin ruahmanna an siam a, ticket 99,354 teh zet an hralh - mahse, official-a inkhel entu puan zat erawh 91,553 zet a ni a, hmeichhe inkhel en tam ber record thar a ni.
Kum 1999 khan Rose Bowl, Pasadena-ah hmeichhe World Cup final khelin USA leh China an inhmachhawn a, penalty-a USA chakna inkhel hi fans 90,195 zetin a hmunah an lo en tawh.
Club football bika hmeichhe inkhel en tam record chu kum 2019 khan siam a lo ni tawh a, Wanda Metropolitano-a Barcelona leh Atletico Madrid inkhel chu a hmunah mi 60,739 zetin an en - he record pawh hi an rawn khum chiang ta hle.
A danglam
Barcelona captain Alexia Putellas chuan, "A danglam a ni. Inkhel a zawh hnu pawhin fan-ten haw an tum lo a, chak kan lawm lai khan players leh fan te khan inzawmna thuk tak kan nei tlat a ni," a ti.
Ballon d'Or dawngtu Putellas chuan, "Hmeichhia leh naupang tam tak, an mitmenga beiseina nei tih hriat tak ka hmu ṭeuh a, he thawnthu ziaktu zinga ka tel hi ka lawm a ni," tiin a sawi bawk.
Goal khungtu zinga mi Bonmati chuan, "Tawnhriat ropui tak tak kan nei tawh a, a bik takin Champions League nomawi chawi kha a ropui hle. Mahse, zanin hi a danglam zawk hial mai thei - Nou Camp-a khat mipuite nena thawnthu thar kan ziak thei hi a ropui ka ti a ni," a ti.
Barca goal ngana khungtu Hansen chuan, "A ropui lutuk a, ka mittui ka dang zo lo ṭep a ni," a ti a, an hun tawn ropui chu sawi zawmin, "Inkhelh zawhah pawh haw mai loin kan chak kan lawm ho a, khatiang kha ka beisei lo - ka hmul thi a ding sung sung a ni," a ti.
Hmeichhe Champions League
Quarterfinal inkhel dangah PSG leh Bayern an inhnehtawk a, French club tan Sandy Baltimore chuan goal hmahruai a khung - mahse, Bayern-in Japanese defender Saki Kumagai leh Lea Schuller hmangin an chhanglet.
Quarterfinal first leg-ah PSG hi 2-1 in an lo chak tawh a, Bayern hi 2-1 a an chak ve leh avangin extra time khelh a ni. Extra time-ah PSG tan Ramona Bachmann chuan si phurh a sut zo a, goal dang lut loin Paris club hi an tlang - inkhel pahnih belhkhawmah 4-3 in an chungnung.
Nizan khan quarterfinal inkhel dangah Wolfsburg vs Arsenal leh Lyon vs Juventus te an inkhel a, he thu buatsaih a nih lai hian result kan hre hman lo. First leg-ah Wolfsburg leh Arsenal hi 1-1 in an inhnehtawk a, Juve-in 2-1 in Lyon an hneh thung.
Hmeichhe football-in tun hnaiah hma a sawn nasa a, a bik takin Nilaini zana El Clasico entu zat hian boruak a tisang lehzual ang - Champions League semifinal pawhin ngaihven a hlawh sawt dawn.
Women's Champions League Quarterfinal
March 30, Nilaini Zan - 2nd Leg
Barcelona 5 - 2 Real Madrid
*Agg-ah 8-3 in Barca an chak
BAR: Maria Pilar Leon 8'; Aitana Bonmati 52'; Claudia Pina 55'; Alexia Putellas 62'; Caroline Graham Hansen 70'
RMA: Olga Carmona 16'; Claudia Zornoza 48'
Paris Saint-Germain 2 - 2 FC Bayern Munich
*AGG-ah 4-3 in PSG an chak
PSG: Sandy Baltimore 17'; Ramona Bachmann 112'
FCB: Saki Kumagai 19'; Lea Schuller 54'
Nizan Inkhel (Result kan hre hman lo)
Wolfsburg 10:15 PM Arsenal
Lyon 12:30 AM Juventus