Nistelrooy-a'n PSV a enkawl dawn

Ruud van Nistelrooy chuan season thar aṭangin PSV Eindhoven a enkawl dawn a, Manchester United striker hlui tan senior team-a manager hna a vawi khat chelhna tur a ni. Kum 45 mi Van Nistelrooy hian season thum atan contract a ziak a, tun season tawp ruala contract tawp tur Roger Schmidt a thlak ang.

Van Nistelrooy chuan, "PSV head coach nih hi ka suangtuah ṭhin. Professional coach ka nih theih hi ka inring a, chutihrualin team enkawl tur hian kum khat inzir belh chu ka la mamawhin ka hria. Mahse thil zawng zawng hi kan duh danin a awm thei lo a, engkim hi ruahman vek theih a ni lo. Tun hi ka tan hun ṭha chu a ni a, PSV ka enkawl tur hi ka phur a ni," tiin a sawi.

Dutch striker Van Nistelrooy hian Sir Alex Ferugson-a hnuaiah hming a chher a, Manchester United tan hlawhtling taka khelin Premier League, FA Cup leh League Cup nomawi a chawi vek. Real Madrid a pan hnuah pawh Nistelrooy hi La Liga-ah vawi hnih a champion.

Chutihrualin Van Nistelrooy-a bul ṭanna hi PSV a ni a, 1998 leh 2001 chhung khan match 67 khelh sakin goal 62 a khung. Kum 2012-a foot-ball khelh a chawlhsan pawh khan PSV youth leh reserve team a enkawl a, Netherlands national team-ah assistant manager hna a chelh bawk.

PSV hi Dutch club ṭha ber zinga mi an ni a, tun season-ah pawh pahnihnaah awm mekin champion lai Ajax point hnih chiaha an phak loh avangin nomawi chawi beiseina an la nei a ni.