USA leh Mexico-in World Cup khel dawn
North, Central America & Caribbean aṭanga World Cup khel tur a chiang ta - Canada an tlin hnuah nimin khan USA leh Mexico an tling ve leh ta a, CONCACAF aiawh tur a chiang kim ta.
Nimin zing inkhelah USA an chak zo lo a, Costa Rica lakah 2-0 in an tlawm. Mahse, US pet chhuak a, World Cup khel turin Costa Rica tan si ruk fai tala chak a ngai a, USA zawk an tling ta tho.
Costa Rica la tling zo rih lo mah se beisei tur erawh a la awm tho - table-ah palina an nih avangin inter-confederation playoff an khel dawn a, Oceania champion New Zealand nen World Cup khelh an la inchuh leh dawn.
Mexico chuan World Cup-a an hmun tichiang turin El Salvador chu 2-0 in an hneh ve bawk a, kum 1994 hnua World Cup zawng zawnga an la inlan vek record chu an chhawm nung zel.
A pawi lo e
Costa Rica-in World Cup khel chiang turin si ruk fai tala chak an mamawh a, CONCACAF team ṭha USA laka result beisei atan chuan a u lam hret a ni - first half chhungin goal a lut lo.
Mahse, chawlhlawk hman a nih hnuah Costa Rica-in goal khung an thiam thar a, Juan Vargas (51') leh Anthony Contreras (59') te chuan second half ṭan aṭanga reilotêah goal hnih an rawn khung nghal.
Costa Rican player-ten beiseina thar an nei a, mahse, USA an ṭang tlang thei a, goal difference hmangin an tlang. US forward Christian Pulisic chuan, "Ka ṭhiante ka chhuang takzet.
"Tlawm zawk nih ka duh ngai lo a, chuvangin ka awm dan hi sawi thiam pawh a harsa hle. Mahse, kan hnathawh ka chhuang a, World Cup khelh ka châk tawh takzet a ni - zinkawng ngaihnawm tak a ni e," a ti - World Cup 2018 an khelh loh hnuah World Cup an khel ve leh dawn ta.
Costa Rica beiseina
Oceania-in World Cup-ah hmun an nei ve lo a, OFC hnuaia qualifier-a ti ṭha ber tan inter-confederation playoff paltlang leh phawt zel a ngai - hetah hian CONCACAF table-a pangana nen an intum ṭhin.
OFC hian qualification match aṭanga ṭanin qualifier an kalpui a, hetah hian OFC hnuaia ranking hniam pahnih Tonga leh Cook Islands te chu inhmachhawn tur an ni. Mahse, Tonga an inhnukdawk a, Cook Islands hi group stage an inpetkai.
Group Stage-ah ram pariat chu group hnihah, team pali ve ve awmin ṭhen hran leh an ni a, an inkhelh kual vek hnuah group pahnihah a ti ṭha pahnih ve ve chuan semifinal an lut a, final hmangin playoff khel tur chinfel a ni.
New Zealand hian Solomon Islands nen final an khel a, final-ah hian 5-0 ngawtin an chak - MLS club Portland Timbers tana khel Bill Tuiloma chuan goal hnih a khung a, Newcastle United striker Chris Wood, Joe Bell leh Matthew Garbett te chuan goal khat ṭheuh an khung bawk a, Costa Rica nen an intawng dawn.
Mexico an chak
El Tri (Mexico sawina) tan El Salvador laka hnehna chang turin harsatna a awm lo a, Mexican club Cruz Azul forward Uriel Antuna leh Raul Jimenez (penalty) goal hmangin 2-0 in an chak.
Mexico-in a zawna a vawi riat nan World Cup an khel dawn a, World Cup-a inlan tam pangana an ni phak. Hetihlai hian beisei tur nei tawh lo inkhelah Jamaica chuan 2-1 in Honduras an hneh a, tling chiang tawh Canada chu Panama lakah 1-0 in an tlawm bawk.
CONCACAF hnuaiah ram 35 an awm a, Saint Lucia an inhnuhdawh avangin ram 34-in inelna an hmachhawn. Rank sang zual panga chu third round an lut sa a, ranking 6-35 te chu group khata team panga zel awmin, group parukah ṭhen an ni.
Group tina hmahruaitu paruk chu second round-ah an intum kual leh a, a chak pathum chuan third round-a ranking sang panga an zawm - team pariat niin an inkhel kual a, a sang pathum hi World Cup khel turin an tling.