Biennial World Cup hi FIFA rawt a ni lo - Infantino

FIFA president Gianni Infantino chuan kum hnih dana World Cup khelh chu FIFA rawtna a nih loh thu a sawi. Kum li dana neih ṭhin World Cup hi kum hnih dana neih rawtna a awm avangin sawiseltu an ṭhahnem a, a bik takin Europe ramin an sawisel nasa.

Infantino chuan, "World Cup chungchangah sawi chian ngai a awm. Kum hnih dana World Cup neih h FIFA rawt a ni lo. FIFA inkhawmpui hnuhnung ber khan 88% in zirchian an duh a, zirchian a nih hnuah thil theih ni mah se FIFA-in a rawt lo. Tunah chuan kan inrawn tawn ang a, tute pawha ṭha ber turin thutlukna kan siam ang," tiin a sawi.

FIFA inkhawmpui vawi 72-na chu nimin khan Doha neih a ni a, president Infantino chuan remchangah lain Russian president Vladimir Putin chu Ukraine run tawh lo turin a ngen.

Infantino chuan, "Covid-19 hri leng vanga buaina kan hmachhawn hnuah ziaawm lam kan pan a, indonain a chhunzawm. Pawisawi lo mi ṭhahnem takin hrehawm an tuar a, an thih phah. Khawvelah innghirnghona a nasa tih hre mah ila football hian inpumkhatna a thlen thei tih hi ka ring. Chutihrualin football hi buaina zawng zawng chingfel theitu erawh a ni lo," tiin a sawi.