Hmalam panin Swiatek a kal zel

Iga Swiatek chu a zawnin match 15 chhung a chak ta. Hmeichhe tennis world number 1 thar hian Petra Kvitova hnehin Miami Open semifinal a lut a, a khingpui hi break point pawh a hmuh tir miah lo.

Kum 20 mi Swiatek hian Kvitova lakah hian 6-3, 6-3 in hnehna a chang a, final lut tur chuan Jessica Pegula a paltlang leh a ngai ang. Pegula-i'n quarterfinal inkhel dangah seeded pangana Paula Badosa a lo hneh ve bawk.

Poland nula Swiatek chuan, "Doha aṭang khan inrintawkna ka nei sang hle a, tun thlengin ka la chhawm. Tuna ka boruak tawn ang hi kalsan loa chhawm nun zel ka duh, chu mi tur chuan hriselna ṭha ka neih pawh ka beisei," a ti.

Miami Open hma khan Doha leh Indian Wells-ah Swiatek hi a champion, kar thara world ranking a chhuah hunah chuan pakhatna a ni dawn. Pakhatna a nih chan erawh number 1 ni lai Ashleigh Barty a chawlh vang a ni thung.

Swiatek hian Caroline Wozniacki, Victoria Azarenka leh Jelena Ostapenko te hnung zuiin, kum 21 tlin hmaa WTA 1000 Masters semifinal vawi li lut thei a ni a, a thlen chin a sangin hmabak a nei êng hle.