Gokulam hmaah Aizawl FC fiahna

Vawiin tlai dar 5:05 hian Aizawl FC-in Kalyani Stadium-ah Gokulam Kerala an hmachhawn dawn. Mizo club hi pariatnaah an awm mek a, relegation stage khel turin zingah an la awm. Aizawl FC khingpui tur Gokulam Kerala erawh pahnihnaah an awm a, champion tura rinkai an nih phak avangin Mizo club tan fiahna ṭha tak a ni thei ang.

Danglamna foreigner
India ram football-ah tun hma aṭang tawhin danglamna thlentu chu foreigner an ni ṭhin a, tun season-a Mizo club chet ṭhat tawk lohna chhan pawh foreigner-te chet ṭhat tawk loh vangah a ngaih theih. Table chungbera awm Mohammedan-in match riata point kua an hmuh theih chhan chu Marcus Joseph vang a ni a, Trinidian forward hian goal 10 a khung tawh.

Gokulam pawhin Luka Majcen an kawl a, Slovenian forward hian goal riat a khung tawh. Mizo club pawhin kum 32 mi Majcen hi an ven uluk a ṭul ang. Mizo club-in I League-a tawnhriat nei ṭha pahnih Aser Pierrick Dipanda leh Willis Plaza te kawl ve bawk mah se an la che ṭha tawk lo.

Cameroonian forward Dicka hian Covid-19 positive vangin match hmasa lam a khel lo a, Trinidadian forward Plaza erawh hliam vangin a khel mumal lo. Mizo club chet ṭhat nan Mizo player-te pawimawh bawk mah se theihna nei sang foreigner Dicka leh Plaza te an che ṭha hi a ṭul hle.

Engtin zel?
Aizawl FC-in an match hnuhnung berah Ramhlunchhunga goal hmangin table mawngphaha awm Kenkre 1-0 in an hneh hram a, Gokulam laka result ṭha nei chhunzawm turin insiamṭhat an mamawh. Kerala club lakah hian a vawi khat nan Dicka leh Plaza ten bul an ṭan a, Kenkre lakah goal an khung lo ve ve.

Mizo club hian Kenkre lakah goal khat chauh khung mah se goal an chhuah loh avangin lawmna tur erawh a awm. Gokulam lakah tlarhnung an tih chak a ṭul dawn. Kerala club hian match sarih an khelh tawh aṭangin hneh loh la tawng lo mah se an match hnuhnung berah Rajasthan FC 1-1 in an draw hram. Si phurh sutna goal hi minute 90-naah Ngangom Ronald Singh-a'n a khung a, thil thlen dan hi Mizo club fuihtu a ni thei ang.

Yan Law hote hian an inkhelh tawhna aṭangin hun tawp dawna tha thlah leh hun tawp thlenga theihtawp chhuah pawimawhzia an hre tawh a, Gokulam lakah result ṭha hlawhchhuah ngei an tum dawn a ni.