Nigeria coach Eguavoen a bang

World Cup khel tura an inpetkai zawh loh hnuah Nigeria boss Augustine Eguavoen chu a hna aṭangin a bang a, hetihlai hian Super Eagles (Nigeria sawina) coaching staff zawng zawng chu ban an ni vek bawk.

Nigeria hian nikum December khan an coach Gernot Rohr chu an ban a, World Cup 2018-a kaihruaitu coach an ban hnu hian technical director ni lai Eguavoen chu coach lailawk atan an lalut.

Player a nih laia Nigeria tana vawi 49 inlan thei Eguavoen hian Africa Cup of Nations-ah khan last 16 a luhpui a, tunah World Cup an inpetkai zo lo - Nigeria-in coach an ban fuh lo tih a lang a, Eguavoen a bang ve zui.

Kum 56 mi Eguavoen hian Nigeria Football Federation (NFF) a a hna pangngai, technical director hna chu a chelh chhunzawm tura ngaih a ni.

Eguavoen-a thawhpui, Nigeria backroom staff Emma-nuel Amuneke, Joseph Yobo leh Salisu Yusuf te chuan thla hmasa lawk khan Nigeria zawm mah se ban an ni a, goalkeeping coach Aloysius Agu pawh ban a ni - kum hnih leh a chanve atana contract an zawrh chu hnuhkir a ni bawk.

NFF general secretary Dr Mohammed Sanusi chuan, "Ram tana an hnathawh avangin coach leh team official te chungah lawmthu kan sawi a, an hma hun atan duhsakna sang ber kan hlan a ni," an ti.

Nigerian football thuneitute chuan uluk taka zirchian hnuah, an ram team enkawl tur chu puanzar thuai a nih tur thu an sawi a, "Kan hmaa chona inchhawpte hmachhawn tura team tuaihriam turin mawhphurhna pek an ni ang," an ti bawk.

World Cup playoff-ah Nigeria hian Ghana chu 1-1 in inhnehtawkpui mahse, away goal rule hmangin an tlang zo lo a, Nigerian fan-ten khelmual chhung leh pawnah lungawi lohna an lantir nasa hle.