Arsenal thlipuiin Spurs a nuai

Premier League boruak sang leh hmuhnawm, goal mawi, buaina, red card leh inlehthal tawnna thil chi hrang hrang te chu Emirates Stadium-a Arsenal leh Tottenham te inkhelah a awm vek.

Pathianni zan North London Derby inkhelah Gunners hian an mikhual Tottenhman 4-2 in an hneh a, point 30 neiin Champions League khel phak chin palina an ni - match 19 chhung tlawm loa kaltluang chungin an hmelma khumhlun Spurs an nek chhuak.

Laipui puak a ring
Unai Emery-a'n Europa League an khelh laia a chhawr loh player ṭha rual a luhtir nghal ṭhawt a, a bul aṭangin an thothang a ṭha nghal. Minute 10-na lekah defender Jan Vertonghen-a'n handball vanga a penalty chawi chu Pierre-Emerick Aubameyang chuan awlsam takin a khung.

Spurs an ngawi reng bik lo, Christian Eriksen-a freekick chu Eric Dier-a'n tauh lutin an si phurh a sut a, chawlhlawk hmain Son Heung-min penalty hlawhchhuah chu Harry Kane chuan an hmahruai nan a khung zui ve bawk a ni.

Spanish manager Emery-a'n second half tirah Alexandre Lacazette leh Aaron Ramsey te a dahlut rual nghal ṭhawt a, thutlukna a siam sual lo. Ramsey ball pek fuh tak chu Aubameyang-a'n chiang zeta a pet luh hnuah, Welsh internatonal hian Lacazette khung tur pawh a siamsak bawk.

French striker ball petin Dier ke a fuh hnuah keeper Hugo Lloris dan hman lohin a lut a, Uruguay international Lucas Torreira-a'n an goal lina leh a club thar tana a goal hmasa ber a khung zui ve bawk. Lacazette a tih tluk vangin Vertonghen chu hun tawp hma deuhin hnawhchhuah a ni a, goal lut tur ang a luh zawh tawh hnu a nih avangin Spurs tan chak loh chhuanlam atana hman a rem lo ang.

Emery Arsenal
Arsene Wenger thlaktu Emery hnuaiah chuan player nghet an awm rih lo a, an khelh chhiat chuan thlak theih vek an ni - hming langsar sa nih vanga thlan an awm ngai lo. An khingpui an beih dan tura zirin player a siksawi mai ṭhin.

Tottenham lakah tlarhnungah player pathum dah an ni a, anni thlawp turin mual sirah wing back Sead Kolasinac leh Hector Bellerin te an awm bawk. Anni pahnih hi an goal nawrna hnar pawimawh an ni a, minute 90 chhung chu mual hma leh hnung lam an kar tawn reng thei a ni.

Midfielder Torreira chu a pumrua te deuh mah se khelmual chhungah chuan palian a ni a, long ball pet hnem lo mah se a hna tura an ruat chin chu hnehsawh takin a hlen chhuak thei a. Uruguayan midfielder Torreira hian an khingpui lamin an nawr tur a chhu chat thei hle, hnai te teah ball pe kualin tlarhnung leh a hma lama awmte zawm khawmtu pawimawh a ni.

Team angin khel ṭha viau mah se goal a luh loh chuan awmzia a awm thei lo. An buaina chingfel tur an nei tawh, Arsenal striker Aubameyang chu EPL season kal laia goal 10 khung thei hmasa ber niin, a kawppui Lacazette-a'n goal khung hnem lo mah se mamawh hunah a rah ṭhin a, khingpui tlarhnung chhaih buaitu pawimawh a ni bawk.

Spurs an buai
Hliam vangin defender rinrawl Davinson Sanchez an chhawr thei lo a, inkhel tir aṭangin Vertonghen chuan beisei a phak lo bawk. Tawnhriat nei tlem Juan Foyth-a'n ho lam taka ball a hloh avangin Lacazette-a'n goal a khung theih phah.

Hma tawngah Kane thlawptu Son chu a talput fo a, mahse South Korea international hian Gunners keeper Bernd Leno a paltlang thei lo. Eriksen ke aṭanga ball chhuak vangin goal khat a lut nachungin Denmark international hi a hlauhawm zui lo; England international Dele Alli pawh Torreira leh Granit Xhaka ten an karcheh ral.

Tottenham manager Mauricio Pochettino chuan, "Goal thumna an rawn khung hma kha chuan dinhmun ṭha zawk kan awm bik lo, a hnu lamah erawh kan thamral ta zawk a ni. Kan tan chuan kan theihna pangngai ang lanchuah tir leh kha a harsa tawh a ni," a ti.

Tun kar Nilaini zanah Premier League inkhel hmuhnawm a awm chhunzawm dawn, Arsenal hi Manchester United khelmual Old Trafford-ah an lenglut dawn a, Spurs hian table mawng lama talbuai mek Southampton an lo mikhual thung dawn a ni.

Boruak a Hot
North London Derby a nih tawh chuan buaina chhuak hi thil thar a ni lo a, thil thlen ṭhin dan phung a ni zawk. Tottenhman midfielder Eric Dier-a'n an si phurh a sut chiah khan mual sir lamah tlan chhoin Arsenal fans chu ngawi turin a ti, a hmuiah a kut dahin zaizir hmangin a lantir.

England international hi a ṭhian ten a goal khung an lawmpui a, Gunners lam substitute ho in warm up-na bulah an inhawr khawm. Stephan Lichtsteiner chuan an khingpui ten hlim taka an goal khung an lawm chu a ngawi rengin a en thei lo, Swiss defender hian Spurs player ho chu a nam.

Tottenham player ho an pawr a, mual sira Arsenal rawlthar ho thisen a lum tih a lang nghal bawk - an buai zui nghal nuaih. He buaina karah hian Dier chuan inkhel bul ṭan tura thlan loh Ramsey chu bench-a ṭhu turin a lo ti. Buaina lian zawk a thlen loh nan Poch pawh a naute khap dai turin a tlan phei a, striker Harry Kane pawhin a naute a khap dai ve bawk.

Arsenal tan contract thar ziah thei rih lo mah se Ramsey hian a club a hmangaihna a la dai chuang lo, bench aṭanga a luh hnuah inkhel boruak thlak danglamtu a ni a, inkhel banah Dier-a'n a tih elna chu Instagram kaltlangin a sawi chhuak zui leh ngat a ni.