MPL-ah Ramhlun N tan hmun a la awm em?

MPL8 Playoff first leg chu vawiin chhun dar 1:30 hian Lammualah Ramhlun North leh Kanan FC ten an khel dawn a, December 7-ah second leg khelh leh tur a ni.

Playoff hi double leg-a khelh a nih dawn avangin team ṭha zawka ngaih chu Ramhlun North an ni ngei mai. Amaherawhchu MPL5 Playoff-ah Chhinga Veng chu qualifier-ah pahnihna ni mah se MPL club Luangmual FC hnehin Mizorama inelna sang ber khel turin an lo tling tawh a, sawi lawk theih a ni lo.

Chhinga Veng khelh dan hi Kanan FC tan fuihna ṭha tak a ni thei a, chutih rualin MPL6 Playoff thlir kir chuan mualpho thei an ni thung. Ramhlun North hi MPL5-ah pasarihna an ni a, playoff-ah erawh an chungnung hle. MPL6 Playoff-ah Ramhlun North hian New Serchhip chu 6-1 leh 5-1 in an hneh a, aggregate-a an chakna zat chu 11-2 a ni hial.

Ramhlun North secretary K. Lalenghluna (Maenga) chuan, "MPL khelh zel hi kan duh a, Kanan FC hneh tur squad chu kan la kawlin ka hria," tiin inringtawk takin Vanglaini a hrilh.