Liverpool chhhandamtu Jordan Pickford!

Merseyside derby-a Liverpool chakna chu Everton goalkeeper Jordan Pickford a ni - English goalkeeper hian injury time-ah Virgil van Dijk goal shot over ngei tur nia ngaih chu a kutin a hui thla a, a hma chiaha awm Divock Origi chuan he ball hi lo chang fuhin a tauh lut a, 1-0 in an chak.

Origi-a'n goal a khung rual hian inhnehtawk tura inngai Jurgen Klopp-a'n a hlimna a thup zo lo a, technical area bak an pelh phal sak an nih loh laiin khelmual chanve deuhthaw tlanin goalkeeper Alisson a va kuah - inkhel boruak sang hrilhfiahtu a ni.

Klopp-a chet dan hi tam takin an dem a, Football Association lam pawhin an kam khat ngei rin a ni.

German coach hi insawifiahin, "Midang zah lohnaa ti ka ni lo a, ka hlim lutuk kha a lo thleng tawp mai a ni. FA-in engtinnge hma an lak dawn ka hre lo a, an thutlukna lo nghah mai a ṭha a ni," a ti.

Hero to Zero

Anfield-a inkhelah team pahnih an inhlau lo tawn a, goal khung ngei tumin chance an inneih chhawk. Minute pek belha a chetsual avangin Pickford-a'n dem hlawh mah se fakna tur erawh tam tak a awm.

England international hian Xherdan Shaqiri goal khung tur ni ngeia lang chu hnai set sawtah ṭha zetin a dang a, injury time-ah erawh a chet ṭhat zawng zawng thai boin a awm a, a chetsual avangin August 2017 hnua a vawi khat nana Premier League-a inlan Origi-a'n chakna goal a khung phah.

Everton manager Marco Silva chuan, "Jordan hi thlawp a ngaihna zawng zawngah ka thlawp tlat dawn a, goalkeeper ṭha tak a ni," tiin a keeper a chhan a, "Game harsa tak a ni a, tlawm kha chu kan phu lo a ni," tiin inkhel a thlirzui.

Tlawm duh lo

Reds tan Sadio Mane langsar mah se Senegalese forward hian vawi thum ngawt chu goal khungna ngei tur nia langah hun a khawhral - Mohamed Salah leh Roberto Firmino ten eng ruai an ang bik lo a, Origi-a'n goal a khung hmain post a tih per bawk.

Reds goalkeeper Alisson sawi hmaih a thiang lo. Brazil international hian Andre Gomes ball tauh chu hnai set sawt aṭangin a dang a, Theo Walcott-a ball tlan luhpui ṭha tak chu a lo tibuai hman a, Gylfi Sigurdsson chuan a hun ṭha neih goal-ah a chantir thei lo bawk.

Liverpool boss Jurgen Klopp chuan, "Vanneih vangin goal kan khung ngei a, mahse thil lang chiang tak chu a tawp thlengin chak tumin kan bei ṭhin tih kha a ni," a ti a, "Everton khan an khelh ṭhat em avangin zah an phu a ni," tiin an khingpui team a fak zui.