Mizoram an chak zel

National Junior Football Championship 2018, Cuttack-a khelh mekah nimin khan Mizoram chuan Chattisgarh 7-0 in an hneh a, December 5 khian match hnuhnung berah Kerala an hmachhawn dawn.

Mizoram tan hian HP Lalremruata chuan hattrick a siam a; Lalmuanpuia, Lalnunzira, Jeffrey Lalmalsawma leh Lalhruaipuia ten goal khat ṭheuh an khung bawk.

First half minute 25 hmain Mizoramin goal hnih an khung tawh a, hemi hnu hian Chattisgarh defender pawimawh chu hnawhchhuah a ni. Mizoramin an khingpui tlemna an hmang ṭangkai a, amaherawhchu hun tawp hmain midfielder pawimawh Emmanuel Lalchhanchhuaha hnawhchhuah a ni ve bawk.

Kerala hian nimin vek hian Uttarakhand chu 5-0 in an hneh a, goal difference-ah Mizoram an ṭhat zawk avangin an match hnuhnung berah draw a tawk a. Coach Lalremtluanga hote an dinhmun ṭha mah se Emmanuel-a tel loin an khelh a ngai dawn.

Mizoram manager Vanlalchhuana chuan, "Emmanuela tel lo tur hi a pawi kan ti a, chutihrualin kan squad-a player tin hi rintlak vek an ni. Goal sarih laia Chattisgarh kan hneh thei hi kan lawm a, kan result ṭha hi chhunzawm zel kan tum ang," tiin Vanglaini a hrilh.

Nimin Inkhel Result
Mizoram 7- 0 Chattisgarh
MIZ : Lalmuanpuia 10'; HP Lalremruata 21', 65', 69'; Lalnunzira 55'; Jefrey Lalmalsawma 89'; Lalhruaipuia 90'