Wilder laka chaka in-ngai Fury a lawm thei lo

Pathianni zing khan world heavyweight boxing-a mipui nghahhlelh bera chhal ngamah Deontay Wilder leh Tyson Fury an inhmachhawn a, Fury hi chak zawkah mi tam takin an ngaih laiin inhnehtawkah puan an ni.

Kum 30 mi Fury chuan, "Dik taka sawi chuan hetiang ang renga thutlukna lai lo hi ka la hre ngai lo a, judge te khan eng inhnek nge an en bik ka hrethiam thei lo a ni," tiin a lawm lo hle.

Los Angeles khawpuia inhnekah hian khawtual tlangval Wilder hian Fury hi vawi hnih ngawt hnek tlu mah se a tho leh ve ve a, round 12 chhung thlirin Fury hian round tam zawk a thunun tih a lang bawk.

Mahse, judge pakhatin 114-112 a Fury chak zawka a puan laiin judge dangin 113-113 a inhnehtawkah a ngai a, judge pakhat Alejandro Rochin chuan 115-111 a Wilder chakah a puang thung.

Fury chuan, "Eng inhnek nge a lo en bik ka hre lo. Hetiang ang thutlukna dik lo tak hian boxing a ti mualpho a, media zawng zawngin a dik lo zawngin boxing hi an tarlang vek tawh dawn a ni. Alejandro Rochin hi a dam chhung atan boxing-a a inrawlh ve phal tawh loh chi a ni," tiin a lungawi lo hle.

British boxer promoter Frank Warren chuan British Boxing Board of Control nen WBC hnenah boxer pahnih an intawn leh theih nan ziaka an thlen tur thu a sawi.

Fury chuan sawi zawmin, "Khawvelin tu nge WBC champion dik tak chu a hria a ni. Wilder kha anmahni ram ngeiah duhsakna lantir a ni a, rangkachak leh rawng hringa chei belt a la nei saw a lawm hle tur a ni," tiin WBC belt chu a ta a nih thu a sawi nghal.

Boxer pahnih inhnekah Fury ringawt hi chak zawka inngai a ni lo. World champion hlui langsar tak tak Floyd Mayweather, Lennox Lewis, Tony Bellew leh Carl Froch-te chuan British boxer hi chak zawk a nih thu an sawi.

Fury hian kum 2015-a boxing legend Wladimir Klitschko a hneh hnuah depression vangin a talbuai zui a, thla 30 zet chu boxing ring chhungah a inlan lo.

Mahse, Wilder hmachhawn tura a inbuatsaih hnuah thla 12 chhungin kg 63 vel a hloh hman a, British boxer thawhrimna leh inpekna hian fak a hlawh hle.

Fury hian an inhnekna aṭanga a sum hlawhchhuah pound maktaduai riat chu in nei lo leh chanhaite tan a pek tur thu a sawi nghal. British fighter rothap chuan, "In nei lote tan in kam sa ang a, ruihhlo ngai leh zu ngawlveite tan ka sum ka hmang dawn a ni. Sum hi hmanna tur ka nei tam lo em em a, mi hausa emaw hausa tawntaw nih tumna ka nei lo. Sumdawng ka ni lo a, boxer ṭhenkhat ang thoa sum tam tak nei loa ka hun tawp hman ka duh a ni," tiin a sawi.