La Liga chung berah Barca bawk
Kar hmasaah Barcelona-in Atletico Madrid an inhnehtawkpui avangin Sevilla-in hma hruai ve zawk mah se an hmahruai chhung a rei lo hle - kar khat a liam hman chauh a, hmahruaitu chu Barcelona an ni leh ta!
Pathianni zan khan Barcelona hian an mikhual Villarreal chu 2-0 in an hneh a, Sevilla chuan palina Alaves chu 1-1 a an inhnehtawkpui avangin pahnihnaah an tla thla a, Barca an phak lohna chu point khat a ni.
La Liga ngaihnawmna belhchhah turin Atletico Madrid chu Barca laka an chak zawh loh hnuin an chak zo lo leh a, an mikhualna ramah Girona nen goal khat ve ve khungin an inhnehtawk - Barca an phak lohna chu point thum a ni mek.
Barca, Atletico leh Real ten beisei loh tak result an neih leh ṭhin avangin season dang zawng aiin La Liga a ngaihnawm a, hmahruaitu Barca leh pangana Real Madrid inthlauhna pawh point nga chauh a ni.
Inhliam ngah Barca
Barcelona-in inhliam vangin Luis Suarez, Arthur Melo, Samuel Umtiti, Sergi Roberto leh Rafinha te an player pawimawh zingah an chhawr thei lo a, Villarreal lakah an ṭhat dan berin an inlan lo.
Catalan club vanneihna erawh an ṭhat dan ber an khelh lo ṭum pawhin goal khung turin an vannei a, ṭum danga Barca team hmuhnawm tak kha hmu lo mah ila goal an ken tel miau avangin point thum nena haw zawk an ni.
Barca tan hian Gerard Pique chuan minute 36-naah Ousmane Dembele hnen aṭanga a ball hmuh ṭha tak chu a tauh lut a, goal dang a luh loh reng hnuah Carles Alena chuan minute 87-naah chak nemnghehna a khung - kum 20 mi midfielder tan La Liga-a a goal khung hmasak ber a ni nghal.
Yellow Submarine (Villarreal sawina) hian Gerard Moreno hmangin hmahruaina hun ṭha nei mah se kum 26 mi striker hian post a tih per a, Barca tan Lionel Messi chuan a hun ṭha neih a chhawr lo bawk - Barcelona hian inelna hrang hranga an match hnuhnung pangaah vawi hnih an chak vena chiah a ni!
Beisei phak thei lo
Season dang ang chu ni se Atletico Madrid-in table chung ber an hlat tawh viauin a rinawm - mahse Barca leh Real Madrid-in beisei an phak loh zar an zo a, tun season La Liga-a vawi sarih draw result an neihna ni turin Girona chu inhnehtawkpui mah se table-ah pathumna an la ni zel.
Mualneitu Girona-in goal an khung hmasa zawk a, an goal hi Atletico goalkeeper Jan Oblak-a'n Cristhian Stuani a tih tluk avanga penalty an hlawhchhuah aṭanga an khung a ni - penalty pettu Stuani hian season hmasa khan league goal 21 a khung a, tun season-ah goal 11 khung leh tawhin La Liga top scorer a ni mek.
Atletico-in minute 82-naah an si phurh sutna goal an hlawh chhuak hram a, Girona defender Jonas Ramalho chuan an lama a tih luh a ni. Madrid khaw club-in beisei an phak lo tluan tih theih a ni a, hetihrual hian Saul Niguez chuan crossbar tih perin goal ngei tura ngaihah Girona goalkeeper Gorka Iraizoz chuan ṭha zetin a dang bawk.
Hetihlai hian table chung lam club zingah Sevilla chu Atletico ang thoin an vannei - Alaves winger Jony Rodriguez goal khung avangin an tlawm mai dawn nia a lan hnuah Wissam Ben Yedder chuan hun tawp dawnah si phurh sutna goal a khung a, 1-1 in an vannei.