Zaninah Watford Vs Manchester City

Premier League champion lai leh hmahruaitu Manchester City chuan zanin dar 1:15 hian Vicarage Road-ah Watford an tlawh dawn a, Pep Guardiola hote hi an hnuaia awm Liverpool-in an hnaih zel avangin inkhel pawimawh a ni.

City an thiam

Manchester City hian match 14-ah hneh loh an la tawng lo a, Wolverhampton Wanderers leh an elpui Liverpool lakah point an hloh tih loh chu an la chak vek.

City hian point 38 an hmu tawh a, Premier League history-ah season liam taa an bul ṭan dan chiah an pha lo. Pep-a hnuaia hnehsawh taka an champion ṭum khan match 14 aṭangin point 40 an hmu a, point hnih chiah an hloh a, vawi khat an inhnehtawk tih loh chu an chak vek tihna a ni.

Chutihrualin ṭum khat chetsual chu a awm thei a, Pep-a hote hian goal 43 khungin season liam ta an phak lohna chu goal khat chauh a ni a, goal venhimah erawh tun season-ah an ṭha zawk. City hian goal ruk chiah an la chhuah a, season liam ta kha chuan tun ang hunah hian goal kua an chhuah tawh a ni.

Reds an rawn lang

City hi an record thlir chuan champion nawn leh mai tur an ni a, amaherawhchu an hnuai chiaha awm Liverpool hian heti taka an che ṭha chung hian point hnih chauhin an pha lo.

Pep-a hote hi vawi khat pawh chesual se match khat leka inlehthal theih a nih avangin Manchester City dinhmun a him lo. Reds vang hian City-in pressure an neih phah a, Premier League nomawi inchuh boruak a la nung hle.

Pep-a naute an dang

Point-ah inhnaih viau mah se khelmualah erawh City an dang leh ṭhin a, kartawpa Bournemouth nen chak an harsat deuh ṭuma an chakna zat pawh 3-1 a la ni tho. Hemi ṭum hian an player pawimawh Sergio Aguero chu tihrawl na vangin a inlan thei lo a, David Silva pawh bench aṭangin a lut.

Hei chauh hi ni loin City hi an champion ṭuma player pawimawh Kevin de Bruyne bakah wing back ṭha mi Benjamin Mendy te hliam vangin an chhawr thei lo a, kim lo pawhin record an nei ṭha hle. City boss Pep Guardiola chuan, "Bournemouth nen khan halftime-ah ka fuih viau a, chutichung chuan second half ṭantirh kha chu first half nen kan khelh dan a inang reng. A tawp lamah erawh a ṭha viau a, Raheem Sterling leh Leroy Sane te kha danglamna thlentu an ni," tiin a winger te a fak.

Watford nen pawh hian Raheem Sterling leh Leroy Sane te hi an lut a nih chuan an goal nawrna ber tur an ni leh dawn a, an lungawina tur chu point thum a ni ang. Premier League bikah chuan Watford lakah record ṭha tak an nei a, Vicarage Road an tlawh hnuhnung pahnihah 5-0 leh 6-0 in an chak.

Table aṭanga thlir chuan Hornets hi point 20 hmuin 10-na chinah an awm a, Manchester United aiin point hnih chauhin an hmu tlem. Amaherawhchu Watford hian match hnuhnung paliah chak hmel an hmu tawh lo a, City lakah point hlawhchhuah a harsa ang.

Zanin Inkhel Tur
AFC Bournemouth 1:15 AM Huddersfield Town
Brighton & Hove 1:15 AM Crystal Palace
West Ham United 1:15 AM Cardiff City
Watford 1:30 AM Manchester City