Euro 2020 Qualifier Netherlands leh Germany group khatah an awm
Pathianni khan Dublin-ah European Championships 2020 khel tur zawnna group chu pawhfel a ni a, Europe ram 55 chu group 10-ah ṭhendarh an ni. Kumin World Cup-a beisei pha lo Germany chu Nations League-a an tluk loh Netherlands nen group C-ah dah dun an ni a, amaherawhchu group khat aṭangin pahnih zelin final round an lut ang.
Draw Kalhmang
Group 10 zinga group hmasa pangaah hian team panga zel an awm. UEFA Nations League semifinal lut Switzerland, Portugal, Netherlands leh England te chu group hmasa paliah (Group A-D) dah an ni. Hei hi a chhan chu he group-ah hian team panga chauh an awm a, match an neih tlem bik avangin fixtures thlak buai ngai loin Nations League final round June thlaah an khel thei ang.
Europe ram 55 chu an ṭhat dan a zirin pot parukah ṭhendarh an ni a, Pot 1-a team paruk chu group E aṭanga J-ah pawh an ni. Pot 2-ah team 10 awmin group hran ṭheuhah an dah a, Pot 3-5 pawh hetiang tho hian pawh a ni a. Pot 6-ah hian team nga chiah an awm a, group G-J ah dah an ni ve thung.
Tling tur zat?
Euro 2020-ah hian team 24 an inel dawn a, qualifying round kaltlang hian team 20 an tling dawn. Group 10 aṭang hian a sang pahnih ṭheuhin final round an lut ang.
Euro Qualifier-ah team tin hi vawi hnih mahni mual leh khualmualah an inkhel ṭheuh ang. UEFA hnuaia inelna dang ang thoin goal difference aiin head to head chu dah pawimawh sak a ni.
Hmunruak pali?
Hmunruak pali hi playoff hmanga zawn leh tur a ni a, hetah hian UEFA Nations League dah pawimawh a ni thung. Nations League-ah hian Europe ram te chu League pali A-D-ah ṭhendarh an ni a, league tin hian quota pakhat ṭheuh an nei a, qualifier-a kaltlang tling lo zinga Nations League-a che ṭha ten playoff hi an khel thei ang.
League A bik hi entir nan hmang ila; Switzerland, Portugal, Netherlands leh England te hi mahni group ṭheuha pakhatna an ni a, qualifier-a an tling zo lo vek a nih chuan playoff kaltlangin hmun ruak pakhat an inchuh dawn. Chutihrualin qualifier kaltlanga tling an awm a nih chuan playoff-ah hian qualifier-a tling zo si lo an hnuaia mi ramin an ai an awh thung ang.
League A ram te hi qualifier kaltlanga an tling vek emaw tling lo hian pali an daih loh chuan League B playoff pha lo zinga ti ṭha ber an rawn lut chho thung dawn a ni.
Team an insem rual
Group tinah team ṭha an insem rual a, tun dinhmunah chuan ngaihnawm bik a awm lo. World Cup hnuhnung ber semifinalist England chu Czech Republic, Bulgaria, Montenegro leh Kosovo te nen an awm ho a, Gareth Southgate-a hote tan harsa tur a awmin a lang lo.
Ram inelnaa che ṭha lo Germany chu Netherlands nen dah kawp an nih avangin ngaihven an hlawh a, amaherawhchu pahnih tlang tur a nih avangin team pahnih hi tlang tura rinkai an ni ang. Germany hi pot B-ah an awm avangin team ṭha tan anni pawh fuh hi a vanduai thlak a, Three Lions manager Gareth Southgate chuan Joachim Low hote nen pawh fuh an nih loh chu a awm thu a sawi.
Inelna match hmasa ber hi March 21-23, 2019 inkarah khelh tur a ni a, group match hnuhnung ber hi November 17-19, 2019-ah khelh a ni ang.
Group inṬhenhran dan
Group A : England, Czech Republic, Bulgaria, Montenegro, Kosovo
Group B : Portugal, Ukraine, Serbia, Lithuania, Luxembourg
Group C : Netherlands, Germany, Northern Ireland, Estonia, Belarus
Group D : Switzerland, Denmark, Republic of Ireland, Georgia, Gibraltar
Group E : Croatia, Wales, Slovakia, Hungary, Azerbaijan
Group F : Spain, Sweden, Norway, Romania, Faroe Islands, Malta
Group G : Poland, Austria, Israel, Slovenia, FYR Macedonia, Latvia
Group H : France, Iceland, Turkey, Albania, Moldova, Andorra
Group I : Belgium, Russia, Scotland, Cyprus, Kazakhstan, San Marino
Group J : Italy, Bosnia & Herzegovina, Finland, Greece, Armenia, Liechtenstein