Ligue 1 ah PSG chak tluang a tawp

Paris St-Germain chuan tun season chhunga a vawi khat nan French Ligue 1-ah point an hloh ve ta. Pathianni zan khan Bordeaux nen 2-2 in an inhnehtawk a, match 14 an chak tluang lai chu a tawp - chak loh erawh an la nei lo tluang zel.

PSG hian Neymar leh Kylian Mbappe te hmangin ṭum hnih hma hruai thei mah se, mualneitu Bordeaux an nep bik lo. Jimmy Briand leh Andreas Cornelius te hmanga sut ve vein point khat hlu tak an hlawh chhuak.

French rawlthar duhawm Mbappe chu a malpui hliam vanga thlak ngai tur angin lang mah se minute 90 chhung khelh tlang tir a ni. Neymar leh Mbappte ten goal an khung bakah Angel di Maria chu a hlauhawm thei hle, mahse Argentine winger hian goal ban leh bar tih perin a vanneih ni a her chhuak lo.

PSG manager Thomas Tuchel chuan, "Match khelh tur kan ngah a, player tin inkhel thei tura an inpeih a ngai. Neymar leh Mbappte ten hliam tenau an nei a, mahse December 8 zana Montpellier nen kan inkhelh hunah erawh an inlan theih beisei a ni," tiin a sawi.

Pathianni zan vek hian match 14 chak zawn tawh PSV Eindhoven chak kaltluang lai chu a tawp ve bawk. Tun hnaiah Dutch league (Eredivisie) a tlak hniam deuh avangin European League lian panga zingah chhiar tel an ni lo, hei vang hian PSG-in a zawna vawi 12 hnehna an chan khan record an siam a ni.

Tun dinhmunah chuan Spain, England, Italy, Ger­many leh France te chu a sang panga an ni a, tun hma lama a sang panga zinga tel phak Eredivisie chu 12-na an ni mek. League ropui tak ni ṭhin kha a tlahniam tawh hle a, a ropuina ang nei let leh tur chuan European football-ah an hlawhtlin choh leh a ngai ang.