Messi leh Rondalo rorelna titawptu Modric

Football khawvela mimal chawi-mawina ngaihhlut hlawh ber anga sawi ngam 2018 Ballon d'Or chu Thawhṭanni zan, zanlaiah sem a ni a, Croatia leh Real Madrid star Luka Modric chuan he chawimawina hi dawngin khawvela footballer thiam berah puan a ni.

Nipui laia Juventus lam pantu Cristiano Ronaldo chu pahnihna a ni a, mak tak maiin Lionel Messi chu pathum zing-ah pawh a lang phak lo - pangana a ni ṭawk!

Atletico Madrid forward Antoine Griezmann chu pathumna a ni a, PSG attacker Kylian Mbappe chu palina a ni thung.

Kum 2008 hnua a vawi khat nan Messi leh Ronaldo tih lohin Ballon d'Or chawimawina an dawng ve ta a, Modric chuan, "Ka hlim dan hi sawifiah theih rual pawh a ni lo a, thuin a daih lo. Ka tan chuan thil hlu chungchuang a ni a, a danglam bik a ni," tiin footballer chawimawina sang a dawng thei chu a hlim hle.

Sawiselna karah...
Modric-a'n Ballon d'Or chawimawina a dawn rualin sawiselna tam tak a ri nghal a, Messi leh Ronaldo ten kum 10 zet ro an lo rel tawhna hmun ṭhiat tur chuan a 'phu' lo niin an sawi a, Messi leh Ronaldo te rorel vanglaia he chawimawina dawng lo Xavi, Andres Iniesta, Wesley Sneijder leh Franck Ribery te hming thlengin lam rik a ni.

Mahse, Modric chuan a chawimawina dawn chu an tan hnehna a nih thu sawiin, "Kum liam ta te kan thlir chuan Xavi, Andres Iniesta emaw Sneijder te khan he chawimawina dawn hi an phu a ni mai thei a, he chawimawina dawn phu em em, dawng si lote tan ka Ballon d'Or hi ka hlan a, tunah chuan mipuite pawhin khaw dang an hawi ve ta," a ti.

Croatian midfielder chuan Messi leh Ronaldo chu player ṭha chungchuang tak an nih thu sawi mah se Ballon d'Or dawn erawh phu a intih thu a sawi. Croatia international chuan, "2017-18 season kha ka tan chuan kum ṭha a ni a, he chawimawina hian khelmuala ka hnathawh a hrilhfiah a ni," a ti a, a hlim hle.

Modric leh a hnathawh
Kum 2007 khan Kaka chuan Ballon d'Or hi dawngin a hnuah erawh Messi leh Ronaldo rorelna a ni. Mahse, kum 2018 a lo herchhuah meuh chuan khawvelin midang a hmu ve leh ta a, Modric hian he chawimawina dawng tur hian eng chiah nge a tih, tih chu zawhna a ni.

Kum 33 mi midfielder hian May khan a zawna a season thum nan Real Madrid chu Champions League nomawi a chawipui a, World Cup-ah inlan zuiin rinkai zinga tel phak lo Croatia chu final a hruai thleng.

Tottenham Hotspur midfielder hlui hi World Cup Best Player-ah thlan zui a ni, Ballon d'Or hma hian UEFA leh FIFA Player of the Year-ah thlan a ni ve ve bawk a, mimalin chawimawina a dawn theih sang zawng zawng chu a hui kim vek!

Enge Ballon d'Or chu?
France rama football lam ziak ṭhin magazine lar France Football chuan 1956 aṭang khan Ballon d'Or hi an sem chuak ṭan a, England forward ropui Sir Stanley Matthews chu dawng hmasa bertu niin kum 1995 thleng kha chuan European player ṭha ber thlanna a ni.

Kum 1995-ah hian European player ni kher lo, Europe-a inkhel tawh phawt tan he chawimawina hi siam a ni leh a, kum 2007 aṭang khan khawvel footballer zawng zawng dawn theih turin tih a ni ṭan.

Kum 2010 aṭanga 2015 thleng kha FIFA nen thawkhoin FIFA Ballon d'Or tih a ni a, mahse kum 2016-ah inṭhen hrang lehin a hran ve vea footballer ṭha ber thlanna hi kalpui zui zel a ni ta a ni.

A thlangtu
France Football magazine-a editorial staff te chuan player 30 an thlang chhuak phawt a, khawvel ram tin aṭangin journalist pakhat zelin vote an thlak a, heta ṭang hian point hmu sang ber hnenah Ballon d'Or hi pek a ni ṭhin.

Journalist pakhat hian player panga zel an thlang chhuak thei a, a chung bera an dah chuan point nga hmuin pahnihna chuan point li a nei a, pathumnain point thum, palina-in point hnih leh panganain point khat neiin an sem.

Indian sports journalist zinga Ballon d'Or-a vote thlaktu chu Dhiman Sarkar a ni a, Hindustan Times sports editor hian Raphaël Varane chu dah sang berin a hnuaiah hian Modric, Mbappe, Ronaldo leh Messi te a dah!