Rawlthar zinga thiam ber Mbappe

Ballon d'Or chawi-mawina sem a nih rualin a vawi khat nan kum 21 hnuai lam zinga playert ṭha ber thlanna Kopa Trophy pawh semchhuah a ni a, PSG forward Kylian Mbappé hnenah he chawimawina hi hlan a ni.

Kum 19 mi striker hian season hman zawh takah khan PSG tan match 44 khelin goal 21 a khung a, Ligue 1, French Cup leh French League Cup-ah te nomawi a chawipui a, World Cup 2018-ah France chu champion puiin Best Young Player-ah thlan a ni bawk.

France tan vawi 28-a inlana goal 10 khung thei striker chuan, "Kopa Trophy dahna tur hi hmun ka siamfel thlap tawh a, ka nomawi dawn tawhte ka dahna zingah ka dah ang a, a dang zel dahna tur hmun ruak pawh ka siam ang," tiin chawimawina dawn belh a tum hle.

Paris khawpuia chawi-mawina semchhuah zanah hian a vawi khat nan hmeichhe footballer tan Ballon d'Or chawimawina pawh sem a ni a, Norway striker Ada Hegerberg chu hmeichhe Ballon d'Or chawimawina pek a ni.

Kum 23 mi striker hian a zawna season thum nan Lyon chu Champions League nomawi a chawipui a, league-ah a zawna vawi li nan champion pui bawkin season hman zawh takah khan match 25-a inlanah goal 42 ngawt Lyon tan a khung sak.