MPL7 Final December 17 - 8:00 PM

Mc Dowell's No. 1 Soda Mizoram Premier League Season 7 final hun chu nimin khan MPL Board-in a tichiang. December 17, Thawhṭanni zan dar 8:00-ah Chhinga Veng leh Aizawl FC ten nomawi an inchuh ang.

Final-a inhmachhawn tur hi league round-a pakhatna leh pahnihna an ni a, MPL hmaa inelna hnuhnung ber I Day Football final-ah an inhmachhawn bawk a, Mizorama team ṭha pahnih an ni.

Chhinga Veng hi tun season-ah Mizoram Police lakah vawi khat an tlawm tih loh chu chak loh an nei lo. Lalsangzuala Hmar hote hi an record ṭha viau mah se MPL-a Aizawl FC ṭum hnih an hmachhawnah an inhnehtawk ve ve.

Aizawl FC hian Chhingcows ngamtu awm chhun Mizoram Police chu semifinal-ah hmachhawnin an hneh a, an record en leta thil chiang chu team pahnih an intluk tawk tih hi a ni.

MPL vawi hnih champion tawh Aizawl FC hian MPL3 leh MPL4-a an champion zawn hnuah nomawi an la chawi leh lo a, champion lai Chhingcows an hneh thei a nih chuan vawi thum champion thei hmasa ber an ni dawn.

Chhinga Veng coach Sanga hian MPL5-ah Chanmari FC an champion pui a, season liam ta khan Chhingcows hi MPL6-ah champion pui lehin coach zinga kum zawna champion thei hmasa ber a ni a, club pahnih champion pui thei hmasa ber a ni bawk.

MPL final khelh hun ruahmanna hmasaah chuan December 7 a ni a, amaherawhchu I League khela Aizawl FC an zin chhuah avangin loh theih loin sawn hlat a ṭul ta a ni.

MFA thuchhuah tarlan danin, December 18-ah sawn an tum zet a, khelmual a remchan theih loh avangin December 17, Thawhṭanni zanah khelh a ngai dawn - ṭhalai inkhawm zan a nih avangin inkhelh hun hi zan dar 8:00-ah dah a nih phah ta a ni.

MPL final en man hi Rs 100 a ni dawn a, Mizoram football inelna sang ber nomawi inchuhna hi a en tlak dawn.