Serie A player ṭha ber Icardi

Inter Milan striker Mauro Icardi chu season liam ta chhunga Serie A Footballer of the Year atan thlan a ni, chawimawina hi Thawhṭanni zan khan Milan-ah hlan a ni.

Kum 2011 khan AC Milan striker Zlatan Ibrahimovic chuan he chawimawina hi a lo dawng tawh a, Swede striker hnuah hian Juventus player hlirin an indawn chhawk - Ibra hnua Juve player ni lo dawng leh thei hmasa ber chu Icardi hi a ni chauh.

Argentine striker Icardi hian goal mawi ber chawimawina pawh a dawng tel, March thla a Sampdoria an sawp ṭuma a goal khung chu thlan a ni. Icardi chuan, "AC Milan laka ka khung kha a mawi zawk," tiin goal mawi chungchang a sawi.

Kum 25 mi Icardi-a'n mimal chawimawina a dawn rual hian Italian champion Juventus chu team ṭha ber atan thlan an ni thung. Juve enkawltu Massimiliano Allegri pawh coach of the year atan thlan a ni bawk.

Italian manager Allgeri chuan, "Team ṭha tak hnathawh a ni a, hetiang chawimawina ka dawn theih nan hian ka hnungah player langsar leh ṭha tak tak ten min zui reng a ni," a ti. Allegri hian he chawimawina hi a vawi li dawnna a ni.