Azpilicueta tan contract thar

Chelsea defender rinrawl Cesar Azpilicueta chuan kum li daih contract a ziak thar leh ta a, Spain international hi kum 2022 thleng chu Stamford Bridge-ah a cham chhunzawm dawn tihna a ni.

Kum 29 mi Azpilicueta hian 2012 khan Ligue 1 club Marseille aṭangin Chelsea hi a zawm a, London club tan hian match 297 khel tawhin Premier League nomawi vawi hnih a chawi pui tawh.

Azpilicueta chuan, "He hmuna ka rawn kal tirh aṭang khan nuam ka tiin ka hlim a, khelmual ka luh tawh chuan a ṭha thei ang bera khelh ka tum ṭhin. Ka hun tawn chinah ka lawm a, Chelsea tan hian thil ṭha leh beiseiawm dang ka tawn chhunzawm theih ka beisei a ni," tiin a sawi.

Blues director Maria Gra­novskaia chuan, "Cesar hi kan player neih lai zinga kan kawl rei berte zinga mi a ni mek a, ani nen hian kum ruk chhung hun ṭha tak kan hmang ho tawh. Tuna a contract thar hi a hmang zo a nih chuan season 10 chhung Blues tan a khel dawn tihna a ni a, ani leh keini tan pawh thil ṭha tak a ni ang," a ti.

Maurizio Sarri kaihhruaina hnuaiah Chelsea hian beisei aia ṭhain season an hmang mek a, table-ah pathumna ni mekin zanin dar 1:15 hian Wolves an lenchilh ang.