Europa League 2 - Europe-a inelna thar tur chu
UEFA chuan Thawhṭanni khan Europe-a club inelna tur Europa League 2 an pawm thu an puang a, 2021 - 22 season aṭanga khelh ṭan nghal tur niin Champions League leh Europa League hnuai chiaha inelna tur a ni.
Kum 2015 aṭang tawh khan UEFA chuan an hnuaia ranking lama hniam zawk ram ten European football an khelh ve theih dan tur an lo ngaihtuah tawh a, Champions League leh Europa League group stage inhlangkai zo loin a tam zawk chu qualifying round lamah an tla zel.
UEFA chuan hei vang hian ram tenau zawka club te tan kawngkhar hawn a duh a, a chhanna chu Europa League 2 a ni. Tun dinhmunah chuan he inelna hi a hming tak tur phuah a la ni lo a, Europa League 2 hi chu hmalak chhunga a hming put rih tur chauh a ni.
UEFA president Aleksander Ceferin chuan, "A hma zawng aiin UEFA hnuaia inelna chuan a huap zau tawh dawn tihna a ni a, club ten match an khel tam sawt dawn a ni," tiin an ruahmanna a sawi.
Ruahmanna chu
Europe-a club inelna sang ber chu Champions League a ni a, UEFA hnuaia club zawng zawng ten he inelna khel tur hian chance an nei vek - ranking hniam zawkten first qualifying round aṭanga an khelh ṭhin avangin group stage han ban phak tur chuan a kalkawng a thui hret e, tih chauh a ni.
Tunah chuan Champions League inpetkai zo lo a, qualifying round hma taka tlate pawhin European football an khel thei tawh dawn - Europa League 2 lamah an tla thla ang a, second qualifying round aṭangin Europa League 2 an khel ve leh ang.
Second qualifying round aṭanga khel ṭan turte hi UEFA hnuaia an ram league champion, Champions League qualifying round paltlang zo lote an ni a, an kalkawng hi 'Champions path' tih a ni.
League path an tih a awm leh a, hei hi an ram league lama champion si loa Europa League 2 khel turte an ni. UEFA hnuaia ranking 1-5 ram te chuan club pakhat ṭheuh an thawh thei ang a, 6-15 in pahnih, 52-55 zinga Liechtenstein leh San Marino tih loh zawngin pahnih an thawh thei ang a, 16-51 te chuan club pathum ṭheuh an thawh thei ang.
Team engzat nge?
Group stage-ah hian team 32 an tling dawn a, team 32 te hi group riatah ṭhen hrang lehin group tinah team pali zel an awm dawn. Group tina hmahruaitu ṭheuh chu last 16 an inhlangkai ang.
Champions League leh Europa League ang lo takin group tina pahnihna te erawhin last 16 an lut dawn lo a, preliminary knockout stage an tih chu an khelh leh phawt a ngai ang - hetah hian Europa League playoff round-a chak lo zawkte nen an intum ang a, a chak zawkin last 16 an lut ve leh ang.
Round of 16 hnu lamah chuan tournament dang ang thoin kalpui a ni ang a, quarterfinal, semifinal leh final ten a zui dawn a ni - Europa League 2-a champion team hian a season tharah Europa League an khel dawn a ni.
Tuna ruahmanna aṭanga a lan dan chuan European football group stage-ah ram 34 aṭang talin club an inlan ziah tawh dawn tihna a ni - tun dinhmunah chuan European football-a group stage khel pha team nei zat ram hi 26 an ni.
Kalpui dan tur - Round tina inlan tur
First qualifying round (72 teams)
UEFA hnuaia ranking 29-55 inkar rama domestic cup champion ten an khel ang.
UEFA ranking 30-55 inkara domestic league-a pahnihna ten an khel ang ( Liechtenstein leh Kosovo an tel lo)
UEFA ranking 30-51 inkara domestic league-a pathumna club ten an khel ang.
Second qualifying round (110 teams)
UEFA ranking 6-28 a domestic cup champion ten an khel ang.
UEFA ranking 16-29 a league runner up leh pathumna ten an khel ang.
UEFA ranking 13-15 a league palina ten an khel ang.
Champions League preliminary leh first qualifying round-a chak lo te leh EL2 first qualifying round-a chak zawk team 36 te khan an zawm ang.
Third qualifying round (62 teams)
UEFA ranking 7-12 a league-a palina ten an khel ang.
UEFA ranking 6-na rama league pangnain an khel ang.
Second qualifying round-a champion team intum zinga a chak 10-in an zawm ang.
Champions path ni lo aṭanga chak team 45-in an zawm ang.
Playoff round (44 teams)
UEFA ranking 1-5 a domestic cup champion ten an zawm ang.
Second qualifying round-a champion team intum zinga a chak 5-in an zawm ang.
Third qualifying round-a non-champion team intum zinga a chak 26-in an zawm ang.
Champions League third qualifying round-a chak lo team pangain an zawm ang.
Europa League third qualifying round-a chak lo team pathumin an zawm bawk ang.
Group stage (32 teams)
Playoff round-a chak team 22-in an zawm ang.
Europa League playoff round-a chak lo team 10-in an zawm ang.
Preliminary knockout stage (16 teams)
Group stage-a group pariata anmahni group ṭheuha pahnihna te an lut ang.
Europa League-a mahni group ṭheuha pathumna te chu hetah hian an tla thla bawk ang.
Round of 16 (16 teams)
Group stage-a mahni group hmahruaitu ṭheuh an lut ang.
Preliminary knockout stage-a hnehna chang zawk team pariat an lut bawk ang.