Lianzuala a vannei thei lo

Mizo tlangval Lallian­zuala Chhangte-in tun season-a a vawi thum nan Delhi Dynamos tan goal khung mah se a team a chakpui zo chuang lo a, goal luh tamna inkhelah Mumbai City chu 4-2 in an ngam lo.

Match 10 khelh tawh a la chak miah lo Del­hi tan Lianzuala hian minu­te thumna lekah goal hma­hruai khung mah se Rafael Bastos chuan Mumbai City tan minute 49-naah penalty hmangin a sut.

Delhi defender Marti Crespi chuan an lam­ah ti goal zuiin Gianni Zuiverloon chuan 2-2 ni turin thungrul ve leh mah se Raynier Fernandes leh Paulo Machado ten khung lehin Mumbai hi 4-2 in an chak - Delhi tan Daniel Lalhlimpuia chu minute kua a la awmin luhtir ni mah se goal erawh a keng tel lo.

Lallianzuala Chhangte chu Emerging Player of the match-ah thlan a ni a, hnehna an chan zawh miau loh avangin Lunglei tlangval tan lawm erawh a kim thei lo.

Zanin ISL-ah inkhel hmuhnawm a awm dawn a, hmahruaitu Bengaluru FC chuan dar 7:30 hian pahnihna NorthEast United an lenchilh ang.