Tuikual South-in champion an tum ngam

Tualchhung basketball ngaina veng Tuikual South hi Mizoram Super League khelh kal laia team nghelnghet bera chhal ngam an ni a, semifinal thleng khan match sarih an khelh tawh chinah point 80 score tling vel thei awmchhun an ni.

Phengphehlep hian final an lut tawh a, December 11 zan hian champion lai Zarkawt BCA nen final game 1 an khel dawn. MSL final game 2 chu December 13 zanah khelh tur niin; game 3 khelh a ngai a ni chuan ni 14 zanah an khel zui nghal ang.

MSL neih tawh chinah la champion lo mah se TKS hian a vawi khat nan champion an tum ruh hle a, assistant coach R. Liansangpuia chuan an naute huaisenna chuan an tum ram a thlen pui theih a beisei thu Vanglaini a hrilh, coach Vivek Pandey chu Mumbai-ah a haw mek, an match hnuhnung berah pawh khan a awm tawh lo a ni.

TKS an nghet

Tuikual South hian an league match hnuhnung bera Zarkawt BCA an hmachawn ṭum leh, semifinal game 1-a Khatla TBL an hneh ṭum point 82 an score a, heng match pahnih hi point an neih tlem ber ṭum a ni - an hmuh tam ber erawh Mission Veng Vikings laka point 90 an score tlin ṭum kha a ni thung.

MSL final-ah Tuikual hian TBL an ngam lo a, kumin semifinal-a an intawng pawh khan chak tur zawka bukrit leh rinkai zawk tia sawi tur an ni bik lo. Amaherawhchu, huaisen takin an tlang thei a, tunah chuan an lawn phak loh tura ngaih an lawn chhuak zui leh a nih pawhin a mak lo mai thei.

Phengphehlep assistant coach R. Liansangpuia chuan, "Player tin an thawkrim em em a, a ṭhenkhat phei chuan team training kan neih zawh hnu hian mimal a chhunzawm pawh an awm hial ṭhin. An awmkhawm rei tawh avangin an inhrechiang a, inrintawnna an neih ṭhat avangin final kan lut thei hial a ni," a ti.

Desmond telna

Tualchhung basketball inelna sang berah hian state pawn player chahluh ṭhin an ni a, kuminah pawh team tinin an nei vek. Mahse, court chhungah a rualin state pawn player pakhat aia tam dah luh theih a nih loh avangin team tana ṭangkai tur lak fuh a ngai hle.

TKS hian Desmond Antwine Medder an nei a, Desmond hi semifinal game hnih an khelhah Player of the Night atan thlan a ni ve ve a, inelna a sang telh telh a, a chet ṭhat tual tual avangin final-ah pawh Zarkawt BCA tana hnawksak ber tura ngaih a ni ang.

BCA pawh enkawl tawh Sangpuia chuan, "Desmond hi ruihtheih thila fihlim, court chhung leh pawna entawn thlak khawpa mi invawng a ni. Keini chauh ni loin MSL en ṭhin chuan a ṭhat zia an chiang. Ani bakah hian tualchhung player tin pawhin inrintawkna an neih avangin beisei kan nei sang hle," a ti.