Khawvawt hnuaiah Aizawl FC fiahna
Vawiin tlai dar 2:00 hian Aizawl FC-in TRC Polo Synthetic Turf Ground-ah Real Kashmir an hmachhawn dawn. I League match neihna tur hmun Srinagar hi tun dinhmunah a vawt tawh takzet a, -4 °C te ni pha hialin tlai lamah 14 °C te a hawlh ve zeuh avangin Mizo club tan khelh a awlsam lo ang.
Insiam ṭhat hun
Aizawl FC hian Mizoram Premier League-ah Mizoram Police hnehin final an lut a, I League match hnuhnung berah East Bengal an hneh bawk avangin result an neih ṭhat vanglai tak a ni. Amaherawhchu fixtures an ngah vanglai taka I League-a an result a ṭhat loh avangin Mizo club hi point nga hmuin table-ah pakuanaah an awm.
MPL club hian Real Kashmir an hneh chuan pasarihnaa awm I League club thar hi an lethal thei dawn a, pangana dinhmun hial an thleng thei ang.
Kashmir hi...
Real Kashmir hian an muala match nga a zawna an khelhna tur chiah a ni a, match hmasa pathumah chak hmel hmu lo vekin Churchill Brothers an draw hnuah Neroca leh Mohun Bagan an hneh lo.
An match hnuhnung berah erawh Kashmir hian India rawlthar ṭha rual dah khawmna Indian Arrows an hneh. An inkhelh tawhna aṭanga thlir chuan Real Kashmir hi league-ah table chanve hnuai lama awm tur niin a lang.
Mizo club tan khaw vawt hnuaia point thum hlawhchhuah hi a awlsam dawn lo niin lang mah se hnehna an chang lo a nih chuan nomawi beiseina a tawp nghalah a ngaih theih tawh a, table chung lama awm pawh a harsa ṭalh ang.
Gift-a thukhawchang
Aizawl FC coach Gift Raikhan chuan, "East Bengal nen khan kan tum a hlawhtling a, ka naute pawh a khel ṭha takzet. Khami ṭuma kan chet ṭhatna chhawm zel kha coach ka nihna ang chuan ka duh a, ka beisei bawk," tiin a sawi.
TRC Polo Synthetic Turf Ground-ah match li khelh a ni tawh a, goal nga chiah a la lut. Hemi chungchang hi sawiin Gift chuan, "Ground nena khaikhin chuan Kashmir khelmual hi a te hret a, goal venhim a awl phahah ngaih theih. Hei vang hian Kashmir nen hian kan chance neih kan hman ṭangkai a ṭul a ni," tiin a sawi.
Aizawl FC khingpui tur Kashmir hian match nga aṭangin vawi thum clean sheet an nei tawh a, goal thum chiah an la chhuah a, goal venghim ṭha ber an nih avangin Mizo club tan point thum hlawhchhuah a har khawp ang.
Real Kashmir hmachhawn turte
Goalkeepers: Lalawmpuia, Gurpreet Singh
Defenders: Lalhriatrenga (Achia), Vanlalduatsanga, Lalrinchhana, Lalramhmunmawia (Te-a); Kareem; Hmingthanmawia (Valpuia)
Midfielders: David Lalrinmuana, Alfred Kemah Jaryan; Bektur Talgat Uulu, Paul Ramfangzauva, Albert Zohmingmawia, Lalrinfela
Forwards: Leonce Dodoz, F. Lalremsanga, Kromah, Lalkhawpuimawia (Mapuia)
Team Dinhmun
# Team P W D L GF GA GD Pts
1 Chennai City FC 7 5 2 0 16 9 7 17
2 Churchill Brothers FCG 6 2 4 0 10 5 5 10
3 Gokulam Kerala FC 6 2 3 1 9 7 2 9
4 Mohun Bagan 6 2 3 1 7 7 0 9
5 NEROCA FC 6 2 2 2 6 6 0 8
6 Minerva Punjab FC 6 2 2 2 5 5 0 8
7 Real Kashmir FC 5 2 1 2 3 3 0 7
8 Quess East Bengal 4 2 0 2 8 6 2 6
9 Aizawl FC 6 1 2 3 8 10 -2 5
10 Shillong Lajong FC 7 1 1 5 9 16 -7 4
11 Indian Arrows 5 1 0 4 2 9 -7 3