Jose Mourinho mikhual tur Emery Arsenal

Zanin dar 1:30 hian Old Trafford-ah Manchester United chuan Arsenal an mikhual dawn a, season thara Champions League khelh tum club pahnih tan Premier League match pawimawh tak a ni ang.

Beisei anga season hmang lo Jose Mourinho tan tun hnaia harh tharna chang Unai Emery naute lo mikhual hi thil châkawm tak a ni dawn lo, hei erawh hriat a ṭha ang - Portuguese manager hian tun hma an intawn tawhna chhut kirin Emery lakah hian a la tlawm lo.

United an ngui!

Manchester United hi an match hnuhnung berah Southampton lakah goal hnih an chhuah hnuin point khat an hlawh chhuak hram a, team te zawk leh talbuai mek Saints laka chak zawh loh hi United tan mualphona a tling.

Portuguese manager Mourinho chuan, "Ka player zingah ball chan tuma tlan tam leh phur tak an awm lo," tiin a naute chu a beisei anga khel chhuak loah a phuh a, a khelhtir dan chu eng ang pawh ni se player ten phur takin khelmual an lut tura a ngaih thu a sawi bawk.

Man United hian season kal laiah goal 23 an chhuah der tawh, league match 14 chiah an la khel a ni; nikum kha chuan hetiang zat chhuah turin match 30 an khelh tlin a ngai. Tun dinhmunah tlarhnung hi an buaina lian pakhat a ni mek.

Hrem vangin Ashley Young a inlan thei dawn lo a, a club hlui laka hliam tenau tuar Luke Shaw chuan Arsenal a hmachhawn theih beisei a ni. Victor Lindelof leh Eric Bailly te an la inlan theih dawn loh bakah Chris Smalling dinhmun a la chiang lo.

Tlarhnung laiah Phil Jones, Nemanja Matic leh Scott McTominay te an inkawp leh a nih chuan EPL season kal laia goal khung hnem pahnihna Gunners lakah an him zo lo mai thei - defensive game khel thiam hmingthang Mourinho-a'n eng tiangin nge a naute a remkhawm ang tih chu hriat a châkawm hle.

Match hnuhnung bera a ṭhiante goal khung tur vawi hnih siamsaktu Marcus Rashford pawhin hliam tenau tuar mah se zanin inlan tura ngaih a ni, forward Alexis Sanchez-a'n a club hlui hmachhawn thei dawn lo mah se Anthony Martial awm avangin a hmunruak a luah zo tura ngaih a ni.

Kum 55 mi Mourinho chuan, "Marcus kha a inhliam, thlak a duh thu a sawi. A tawrh angah chuan player ṭhenkhat chu chawlhkar hnihte an chawl ang, mahse ani hi chu kan match lekpek atan pawh hian inkhel turin a inpeih ang," a ti. English forward hi a player zinga thaza awmchhun ang hialin a lo fak tawh bawk.

Phur vanglai

Arsenal manager Unai Emery chuan Manchester United nena an inkhel result chu an nihna tak lanchhuahna tur pakhat a nih thu a sawi. Tottenham hneh zo hlim Gunners phur vanglai tak a ni a, September 2006 hnua a vawi khatna Man United mualah league match bika hnehna an chan hmasa ber ṭum tawng an tum.

Match 19 hneh loh tawng loa kaltluang tawh Gunners manager Emery chuan, "Kan tan chuan chona lian tak a ni a, tun ṭuma kan inkhel tur hian kan boruak tawn mek a hrilhfiah ang," a ti. Spanish manager hian Spurs an hneh zawh hlim khan nasa lehzuala hmasawn a duh thu a sawi tawh bawk.

Old Trafford chungchang sawi zuiin Emery chuan, "Hnehna chan harsatna hmun a ni tih ka hria, player ṭha tak tak ten team lian tak an din a ni a, boruak pawh a lianin a sang hle ang. Chutih rualin kan tan chuan min ti phurtu leh chakna min siamsaktu a ni hlauh thei thung," a ti.

Arsenal hian United lakah midfielder pawimawh Granit Xhaka chu hrem vangin an chhawr thei dawn lo a, hnungzângna Mesut Ozil dinhmun a la chian loh bawk avangin midfield laiah Lucas Torreira-a'n tu nge a din pui ang tih chu zawhna lian tak a ni.

Season tawp ruala contract tawp tur Aaron Ramsey a inpeih a, Welsh international hian Spurs lakah bench aṭanga a luh hnuin assists vawi hnih a nei thei. Rawlthar Matteo Guendouzi an la nei tel bawk - United lakah tawnhriat ngah zawk Ramsey a lut a nih pawhin a mak lo ang.

Ramsey chanchin an zawhna chhangin Emery chuan, "A chhuah dawn leh dawn loh hi tuna sawi theih a ni lo. Thil chiang tak pakhat chu team tan a theihna zawng zawng a hlan a, thil dang ngaihtuah a nei lo, hei hian min ti lawm hle a ni," tiin a sawi.

Arsenal hian goal khung hnem lamah Manchester City chauh tluk loh nei mah se, a sang paruk zingah goal an chhuah hnem ber. Captain Laurent Koscielny-a'n training zawm tawh mah se a la inlan dawn lo a, Nacho Monreal a inhliam bawk avangin Shkodran Mustafi, Sokratis Papastathopoulos leh Rob Holding te an inkawp leh ang.