Mizoram dinhmun hriat dawn

National Junior Football Championship 2018, Cuttack-a khelh mekah vawiin tlai dar 2:30 hian Mizoram chuan group match hnuhnung berah Kerala an hmachhawn dawn. Lalremtluanga hote hian an khingpui aia goal difference an neih ṭhat avangin semifinal lut turin draw a tawk.

Mizoram coach RT-a chuan, "Kerala ho training kan hmu a, an lian rual hle. Chuvangin keini chuan draw game kan plan thiang lo a, kan khelh ṭhin danin ground ball kan khel ang. Chutihrualin goal venhim a pawimawh avangin kan wing back te chu ṭum dang aiin an tlan chhuak tlem ang," tiin Vanglaini a hrilh.

Mizoram hian match hmasa berah Uttarakhand chu 5-0 in an hneh a, hemi hnu hian Chattisgarh 7-0 in an hneh leh a, an khelh tawh chinah harsatna tawk lo mah se match hnuhnung bera an chetsual chuan tla thei an ni a. Midfield-a player pawimawh leh captain ni bawk Emmanuel Lalchhanchhuaha chu hrem vangin a inlan thei dawn lo.

Coach tawnhriat nei ṭha RT-a chuan, "Result ṭha nei turin theihtawp kan chhuah a, Mizo mipui ṭawngṭaipuina kan ngen tel bawk," tiin a sawi. Mizoram team hi RT-a leh manager Vanlalchhuana ten an ho a ni.

December 1, Inrinni
Mizoram 5 - 0 Uttarakhand
MIZ : Emmanuel Lalchhanchhuah 5'; Lalhmingchhuanga Hauhnar 30'; Lalhruaipuia 45'; R. Lalhmingmawia 65'; John Lalmuanpuia 90'

December 3, Thawhṭanni
Mizoram 7- 0 Chattisgarh
MIZ : Lalmuanpuia 10'; HP Lalremruata 21', 65', 69'; Lalnunzira 55'; Jefrey Lalmalsawma 89'; Lalhruaipuia 90'

Vawiin Inkhel Tur
Mizoram 2:30 Kerala

# Team Pld W D L GF GA GD Pts
1 Mizoram 2 2 0 0 12 0 12 6
2 Kerala 2 2 0 0 8 0 8 6
3 Chhattisgarh 2 0 0 2 0 10 -10 0
4 Uttarakhand 2 0 0 2 0 10 -10 0