Champion tum Liverpool & City boruak a sang

Liverpool leh Manchester City ten Premier League-a match khelh tur an la neih zat chu match kua a ni a, team pahnih inthlauhna chu point khat chiah a ni.

English football mai ni lo, European football-a team hmuhnawm ber pawl pahnih inthlauhna hi point khat chiah a ni a, Jurgen Klopp leh Pep Guardiola enkawl team inum an nihna hian a tingaihnawm lehzual.

Liverpool hian vawiin tlai dar 5:00-ah Watford an mikhual dawn a, Watford hi relegation zone aṭanga talchhuah tum an nih avangin Klopp-a naute tan hna a awlsam lo ang.

City-in zanin dar 7:30-ah Burnley an lenchilh dawn a, Burnley hi Watford ang thoa thih leh dam kara leng an ni a, thih tha nena ṭang team lenchilh a awlsam ngai lo.

Beiseina tlem
Watford boss Roy Hodgson-a'n Liverpool lakah chance an nei tlem tih a hria a, zep a tum lo. Anfield-a Watford chak hnuhnung ber chu kum 1999 kha a ni a, kha kuma piangte kha nula tlangval an ni tawh!

Liverpool boss hlui Hodgson chuan, "Liverpool ṭhatzia leh an ṭhat chhanah hian engmah zep tur a awm lo a, kan hriat sa vek a ni. Result ṭha neih theih nana kan theihna sang bera khelh hi kan beisei theih chu a ni mai," a ti a, an inthlauh thu a pha lo.

Watford hi league match hnih a zawna an tlawm hnuah an match hnuhnung berah an chak leh tawh a, Southampton chu 2-1 in an hneh - Anfield-ah thil mak thlentir an beisei ang.

Hodgson-a'n Liverpool a lo enkawl tawh avangin Anfield a hrechiang a, hei hi Watford beiseina siamtu pakhat a ni - danglamna thlen thei player Ismaïla Sarr leh Emmanuel Dennis an nei bawk.

Arnold dinhmun
Reds tan malpui hliam Trent Alexander-Arnold dinhmun a la chiang thei lo. Liverpool boss Jurgen Klopp chuan, "Trent tan inkhelh nghal a harsa mai thei a, mahse, inlan thei a nih thu erawh hrilh ka ni," a ti a, a chhawr nghal erawh a rinawm chiah lo.

Arnold a inlan theih loh chuan Joe Gomez chu right back mawhphurhna la leh tura ngaih a ni. International break-a Guinea squad aṭanga hliam vanga inhnukdawk Naby Keita a inlan a rinawm lo a, mahse, Reds hian midfield-a khel turin Thiago Alcantara, Fabinho leh Jordan Henderson te an nei.

Mohamed Salah hian ram tan match pawimawh khel chau mah se inkhelh châk reng a ni a, Watford lakah inlan tura ngaih a ni - tlarhmaah Diogo Jota leh Roberto Firmino nen an inkawp a rinawm.

Liverpool hian tlarhmaah Sadio Mane leh Luis Díaz an la nei cheu tih hriat a ṭha a, Merseyside club squad hi Watford hneh turin a chhah ṭha tawk.

Thawh a hun
Man City-in an league match hnuhnung paliah vawi hnih chiah chak an nei - Tottenham Hotspur lakah 3-2 in an tlawm a, Everton leh Manchester United hneh zui mah se Crystal Palace nen 0-0 in an inhnehtawk.

Pep-a naute an chetsual laiin Liverpool an chesual ve si lo a, Etihad Stadium-a an la mikhual tur Reds-in an hnaih phah ta viau. City-in champion an tum chuan chetsual a thiang tawh lo.

Dam lohna avanga Brazil kohna hnartu Ederson chu a dam ṭha tawh tura ngaih a ni a, international break-a hliam tenau nei John Stones leh Raheem Sterling pawh an dam tawhin a rinawm.

Man City hian malpui hliam vangin Ruben Dias an chhawr thei lo mek bawk a, Stones-a dam hman lo bawk a nih chuan Nathan Ake chu Aymeric Laporte kawppui tur a ni ang.

A har dawn
Premier League table-a 19-na Burnley tan him turin thawh a ngai tawh a, mahse, tun hnaia an result thlirin beisei tih san a harsa - Brighton & Hove Albion leh Spurs a zawna an hneh hnuin league match li chu an chak zo lo leh tawh.

Chu mai a ni lo - Burnley hi an ṭhat dan berin an inlan thei dawn lo. Captain Ben Mee chu hliam vangin a inlan theih a la rinawm loh a, Brentford laka red card a hmuh avangin Nathan Collins a inlan thei dawn lo bawk.

Tlarhnung laia James Tarkowski kawppui turin Kevin Long a luh a ngai dawn tihna a ni a, kum 31 mi defender hi a inlan a nih chuan tun season-a Premier League match a khelh hmasak ber a ni ang.

City hian Phil Foden, Riyad Mahrez, Bernardo Silva leh Kevin De Bruyne te an nei tih hriat a ṭha a, Burnley tan anni danchah hi a awlsam dawn lo.