World Cup khel turin Mizo tleirawl an inpeih

Lalremsiami Hmar chuan 2022 Women's FIH Hockey Junior World Cup khel tura an inpeih thu Vanglaini a hrilh. Mizo pathum - Remsiami, Lalrindiki leh Marina Lalramnghaki telna India hian vawiin chhun dar 12:30-ah Wales an hmachhawn ang.

Mizo player-te hi Thenzawl Hockey Training Center aṭanga inzir chhuak vek an ni. Thenzawl lama an coach B. Lalroṭhuami chuan "Kan naute ka ringtawk, India tan rinrawl leh player pawimawh an ni ngei ang," tiin Vanglaini a hrilh.

Potchefstroom, South Africa-a inelna neih hi internet kaltlangin 'watch.hockey' ah en theih a ni dawn. Tournament hi nikuma neih tur kha ni mah se hri leng vangin khelh theih a ni lo, kuminah an sawn hla a ni.

India beiseina
Women's FIH Hockey Junior World Cup-ah India inlan vawi ngana tur a ni dawn a, tournament an khelh hnuhnung ber chu 2013 kha niin bronze medal an hlawh chhuak, medal la tur hian England an hneh a ni.

Junior World Cup an khelh hnuhnung ber hian, tuna senior captain Rani Rampal leh Vandana Katariya te pawh an tel. Tun ṭumah hian senior team tana khel phak, mahse an kum a la tlem vanga junor huanga inlan thei an awm.

Captain Salima Tete, Lalremsiami leh Sharmila Devi te hi Tokyo Olympic khel tawh vek kha an ni a, senior huangah pawh tawnhriat an nei ṭha. An ṭhiante hnenah thil tam tak hrilh chhawn tur an nei dawn, a ṭangkai thei ang.

India awmna
FIH Hockey Junior World Cup-ah hian ram 16 an inlan, inlan phak nih pawh thil awlsam a ni lo. Pool hrang hrang paliah ṭhen hran leh an ni, India hi Pool D-ah Germany, Malaysia leh Wales te nen an awmkhawm.

Pool khata team pali hi vawi khat ṭheuh an inkhel kual dawn, chumi hnua point hmu sang pahnih chuan quarterfinal an lut zel ang. A thiam hlir inel tur an nih avangin vawi khat chetsual pawh a pawi thei dawn.

India coach Erik Wonnik chuan, "Inbuatsaihna kan nei ṭha, kan nauten inrintawkna an nei sang bawk. Tournament chu vannei leh vanduai inkar a zau ṭhin, chutihrualin keini lam chuan kan theihtawpa ṭhain hmachhawn kan tum," a ti.

India Squad:
Goalkeepers: Bichu Devi Kharibam, Khushboo
Defenders: Marina Lalramnghaki, Preeti, Priyanka, Ishika Chaudhary (vice-captain), Akshata Abaso Dekhale
Midfielders: Vaishnavi Vitthal Phalke, Salima Tete (Captain), Reet, Ajmina Kujur, Sharmila Devi, Lalremsiami, Baljeet Kau
Forwards: Lalrindiki, Jiwan Kishori Toppo, Mumtaz Khan, Beauty Dungdung, Deepika, Sangita Kumari

Inbuatsaihna kan nei ṭha a, taksa leh rilru pawh a fit. Beiseina pawh kan nei sang ve hle, a hlawhtlinna erawh Pathian kut a ni. Mizo mipuite min ṭawngṭaipui turin ka sawm.
- Lalremsiami Hmar

Kan inringtawk, kan ṭha tawk viauin ka hria. Tournament khelh kan châk tawh takzet.
- Lalrindiki

South Africa boruak hi kan rin aiin a zângkhai, a nuam pawh kan ti phian. World Cup khelh dawn meuh chuan ka phur khawp mai. Chak ngei turin theihtawp kan chhuah ang.
- Marina Lalramnghaki