Premier League Golden Boot inchuhna

Tun season Premier League-a goal khung tam ber turin Mohamed Salah dinhmun a ṭha hle. Liverpool forward Salah hian goal 20 a khung tawh a, amah hnaih bertu a khelhpui Diogo Jota leh Tottenham forward Son Heung-Min ten goal 13 ve ve an khung.

Egyptian King hian an ram World Cup tlinpui thei lo mah se Premier League lamah erawh hma a sawn zel a, contract thar a beisei mek avangin infuihphurna tur ṭha tak a nei a, Golden Boot dawng tura khan ber a ni.

Salah Hmasawnna
Premier League hi season 29 khelh a ni tawh a, top scorer zinga goal 30 khung tling hi player pariat chauh an awm. Chung zingah chuan Alan Shearer-a'n season khata goal 30 khung tlin hi ṭum hnih a nei a, England international hlui hi Premier League-a goal khung tam ber record kawltu a ni bawk.

Mohamed Salah pawh hian 2017-18 season khan goal 32 khungin top scorer a ni a, tun season-ah goal 20 a khung tawh avangin goal 30 khung turin a dinhmun a ṭha. Liverpool forward hian Golden Boot hi 2018-19 season khan goal 22 khungin a lo dawng tawh a, tun season hi a vawi thumna ni tur a ni thei ang.

Tun hnai season thum thlir kirin Salah hian hma a sawn tih a hmuh theih. Eygptian forward hian 2019/20 leh 2020/21 season khan minute 151.8 leh 140 danah goal a khung zel a, tun season-ah chuan minute 113 danah goal a khung.

Salah hian ball ṭha a hmuh bakah amaha insiam chawp pawh a ngah. Goal 20 a khung zinga goal ruk hi amaha insiamchawpah a chhiar theih a, chung zingah chuan Manchester City leh Watford laka a solo goal pawh a tel.

Eygptian forward hi top scorer a nih loh chuan thil mak a tling ang. April thlaa Salah hmachhawn tur team-te chu Watford, Manchester City, Manchester United, Everton leh Newcastle United te an ni a, Reds fixtures hi a awlsam lo mah se Egyptian King hian club lian pawh a ngam tih hriat a ṭha.

Jota leh Son
Portuguese forward Diogo Jota hi Liverpool player zingah amah aia khel tam player pakua awm mah se top scorer ni thei zingah a la tel tlat. Jota hian match 20 inkhel bul a ṭan aṭangin goal 13 a khung. Ram tan pawh Jota hian goal khung hi a chhunzawm zel a, Portugal-in World Cup an khelh theih nan Turkey an hneh ṭumin goal pawimawh a khung.

Jota goal 13 zinga goal 10 hi one touch hmanga a khung a ni a, a khungna hi yard hnih aṭanga yard kua inkar a ni. Wolves tana a khelh lai khan league match 67 aṭangin goal 16 a khung a, Liverpool tan league match 45 aṭangin goal 22 a khung. Portuguese forward hian a ke pahnihin goal a khung thei a, Jurgen Klopp hnuaiah hma a sawn.

Tottenham forward Son Heung-min hian Jota ang thoin penalty tel loin goal 13 a khung tawh a, player pahnih hi Salah hnaihtu an ni. South Korean star hian an mualah goal 10 a khung a, mahni muala goal khung tam ber a ni mek.

Spurs hian khawvel striker ṭha ber zinga mi Harry Kane an kawl a, amaherawhchu English striker hi midfield-ah tawlh letin Son tan ball ṭha a pe ṭhin. Chutihrualin Kane pawh hian goal 12 a khung tawh a, penalty pettu a nih bawk avangin season a tawp meuh chuan Son aiin a khung tam zawk a rinawm.