Vawiinah MFA Cup semifinal
GIG Motors 20th MFA Cup semifinal chu vawiin hian Keifang Centenary Football Ground-ah khelh a ni dawn. Chawhma dar 11:00-ah Champhai club FC Vengthlang North leh Lunglei club Chanmari FC te an inkhel leh ang a, tlai dar 2:00-ah Aizawl champion Kanan FC leh FC Serchhip Kawnpui te an inkhel ang.
Hnahthial an tlai!
Nimin zing khan group match hnuhnung ber khelh a ni a, Hnahthial club Electric FC-in Siaha FC 5-1 in an sawp. Hnahthial club hi chiang takin chak mah se an match hmasa bera Serchhip Kawnpui lakah an ṭan tluan theih loh avangin group match hnuhnung ber hma hian semifinal beiseina a tawp tawh.
Chutihrualin Electric FC hian an match tawp berah an theihna zawng zawng an lantir tho a, Serchhip nena inhnehtawk Siaha lakah chiang takin an chak. Siaha hi 2-0 in chak se, semifinal lut thei tur an ni a, Hnahthial club zawk an chak avangin Serchhip Kawnpuiin semifinal an lut.
Aizawl vs Serchhip
FC Serchhip Kawnpuiin Mizoram Premier League bakah I League leh Indian Super League-a khel pha player an kawl lo a, tulachhung player-ah an innghat. Serchhip manager C. Lalrempuia chuan, "Player ang zawng chuan inchhuanna tur kan nei lo. Semifinal pawh a lut har ber kan ni a, kan chhuan tur neih chhun chu kan thawhhona ṭha hi a ni. Aizawl champion hneh turin theihtawp kan chhuah ang," tiin Vanglaini a hrilh.
Aizawl club Kanan FC-in MPL tawnhriat nei ṭha player an khawm thei a, coach tawnhriat nei ṭha Chawnthangsanga'n a enkawl bawk. Amaherawhchu Kanan FC hian an match hmasa berah Saitual FC lakah point khat an hlawh chhuak hram a, semifinal lut turin Saidan FC an hneh hram. Chak tur zawka rinkai ni mah se Kanan FC hi chak chiang saa dah an rem lo.
Lunglei vs Champhai
Semifinal hmasa zawka inkhel tur FC Vengthlang North leh Chanmari FC te hi an intum tawk khawp ang. Lunglei club Chanmari enkawltu F. Lalrozara hian nikum kum tawp khan Mizoram hmeichhe team chu National Senior Women's C'ship-ah semifinal a thlenpui a, tualchhung football-ah pawh tawnhriat a nei ṭha.
F. Lalrozara chuan, "Ka player-te hi ka enkawl tawh leh ka hriat chian tawhte an ni hlawm a, Champhai club hneh chauh ni loin champion hial kan inbeisei. Chutihrualin kan hmabak a harsa dawn a, theihtawp kan chhuah a ṭul dawn," tiin a sawi.
Lunglei aiawha khelte pawhin tawnhriat an la ngah bik lo a, India junior team tana khel tawh Lalpekhlua Jongte chu hming langsar zinga mi a ni. Champhai lamin MPL-a hriat hlawh Lalsawmzela an kawl a, 2017 MFA Cup-a Champhai Bethel champion puitu player panga Mark Ngaihte, Lalramsanga, Lalremruata, Caleba Lalnunhlima leh keeper Lalnunpuia te an kawl bawk.
Champhai manager H. Vanlalpeka chuan, "Kan team balance a ṭha a, Lunglei hmachhawn turin kan inpeih," tiin Vanglaini a hrilh. Lunglei leh Champhai inkhel a hmuhnawm ang.
Nimin Inkhel Results
Electric FC 5 - 1 Siaha FC
EFC : Rorelliana 34' (P); Jeremy Laldinpuia 45+3', 59', 83'; Lalnunzira Hnamte 61'
SFC : J. Ephatha 89'
Semifinal
April 2, Inrinni
FC Vengthlang North 11:00 AM Chanmari FC
Kanan FC 2:00 PM Serchhip Kawnpui
Final - April 4, Thawhṭanni