National Basketball C'ship Vawiinah Mizoram an chhuak dawn

Basketball Federation of India (BFI) buatsaih 71st Senior National Basketball Championships Men & Women khel turin Mizoram chuan vawiin hian inelna neihna tur Chennai, Tamil Nadu an pan ang. Mizoram hi National Basketball C'ship khel tur hian NorthEast-ah an champion a, inelna hi April 3-10, 2022 chhung hian Nehru Stadium-ah khelh a ni ang.

National Basketball C'ship khelh phak hi Mizoram tan hlawhtlinna a tih theih a, India ram team ṭha 16 zinga tel hi inchhuanna tham a tling. Nikum December thla khan Shillong-ah NorthEast Championship khelh a ni a, Mizoram hian team ṭha zawka ngaih Assam hnehin an champion.

Tun ṭumah hian Mizoram hi inelna thlengtu Tamil Nadu bakah Uttarakhand leh Delhi te nen an awm ho dawn a, vawi khat hnehna chan pawh a harsa ang. Chutihrualin head coach KC Lalliantluanga leh assistant coach Lalruatfela hnuaiah Mizoram hian chona thar an hmachhawn dawn a, Mizoram basketball tana rahbi thar chuangkai turin theihtawp an chhuah dawn a ni.

Inelna hi April 3, Pathianni aṭanga khelh ṭan tur ni mah se fixtures puanzar a la ni lo. Vawiin hian team an thleng kim dawn a, zanina Manager’s Meeting neih hunah puan chhuah a ni ang.

Group Inṭhen Dan
Group A: Punjab, Gujarat, Kerala, Telangana.
Group B: Uttar Pradesh, Karnataka, Rajashthan, Services.
Group C: Tamil Nadu, Uttarakhand, Delhi, Mizoram.
Group D: Madhya Pradesh, Haryana, West Bengal, Indian Railways.

Squad List
1 Lalrina Renthlei (C) Tuikhuahtlang
2 F. Zodinthara (VC) Tuikual South
3 Vanlalthazuala Bungkawn
4 Zonunsanga Ramthar
5 Zonunsanga Tuikhuahtlang
6 Vanlalrinchhana Zotlang
7 Lalnunpuia Renthlei Bungkawn
8 Dennis Lalmuanpuia Dawrpui Vengthar
9 K. Lalfakzuala Mission Veng
10 R. Lalfakawma Durtlang Leitan
11 Michael Liansanga Serchhip
12 Matthew Remtluanga Sailo Zarkawt

Coaching Staff:
Manager K. Zorammuana Kolasib/Bawngkawn
Coach KC Lalliantluanga Armed Veng South
Asst. Coach Lalruatfela Dawrpui