Harh thar Juve mualah Inter

Serie A champion lai Inter Milan hian kumin tirah khan chuan hma an hruai, mahse tunah chuan hmahruaitu AC Milan an phak lohna chu point ruk a ni. Simone Inzaghi naute hian Pathianni zan dar 12:15-ah Juventus an tlawh dawn, chetsual a thiang tawh lo.

AC Milan tan chuan Inter leh Juve hi inhnehtawk se, tih chu duhthusam a ni ang. Mahse, team pahnih erawhin ngaihdan dang an nei dawn - Inter hi an chak a nih chuan nomawi hum beiseina a la nung ang; Old Lady tan pawhin title an la beisei ngam ang.

Hripui len hnua a vawi khat nan Allianz Stadium khatin fans an pungkhawm thei dawn. Juventus Stadium khat tlata mipui an punkhawm chuan mikhual tan inkhelh a awlsam dawn lo, ‘Derby of Italy’ a hmuhnawm dawn.

An zam lo
Tun hnaia Inter Milan chet ṭhat tawk loh chhan chu goal khung an harsat hi a ni. Tlarhmaah Alexis Sanchez, Edin Dzeko leh Lautaro Martinez te nei mah se chak an harsat tlat, tun ṭumah erawh chak ngei an tum.

Inter manager Inzaghi chuan, "Tun ang hun hi chu kan tawng fo tawh, eng tianga paltlang tur nge tih kan hria, chuvangin Juventus hi kan hlau lo. Nikum November leh December thla vel kha chuan duhthusamin kan khel.

"January thla tawp lamah erawh kan zuih, tunah hian ṭha taka kan khelh ang khan tih leh kan tum ang," a ti. Inter hian Allianz Stadium-ah kum 10 deuh thaw chu league match bikah chak an la nei lo, an hna chu a hautak dawn.

An inringtawk
Champions League leh Serie A nomawi duh vangin Massimiliano Allegri an ko kir a, mahse bul an ṭan chhiat em avangin beisei an nei sang tawh lo. Italian manager hian UCL khelh phak an tum thu a sawi a, tunah erawh an tan league champion nihna kawng a la inhawn thu a sawi.

Allegri chuan, "Real Madrid zawm turin inremna kan nei hman tawh a, mahse Juventus hi ka thlang leh zawk. Ka thutlukna hian Old Lady lakah rinna ka nghah ngam zia leh beiseina ka nei sang tih a lantir.

"Chet fuh loh leh tlak hniam lai chu a awm thei, mahse Juventus kan nih avangin kan tho chhuak leh mek. Kan chungah team dang an awm tih kan hria, anni en loin keimahni chauh kan inen tur a ni," a ti.