Premier League-ah substitution panga theih dawn

Premier League chuan 2022-23 season aṭangin substitution panga a siam theih tawh dawn. Ningani khan London-ah club neitute an inhmukhawm a, substitution panga siam an remti.

"Substitution chungchangah club-ten dan thlak an remti a, season thar aṭangin substitution panga an hmang thei ang. Substition panga hi ṭum thumah siam tur a ni a, halftime laiin a thlak theih bawk. Team sheet-ah substitute pakua an awm thei bawk ang," tiin Premier League-in thuchhuah a siam.

Football dan siamtu International Football Association Board (IFAB)-in Covid-19 hri leng vangin May 2020 aṭang khan substitution panga hman a phal a, Premier League club-te erawhin tun season ṭantirh thleng khan hman an duh lo.

English club-ten FA Cup, League Cup leh Europe inelnaah substitution panga siam thei mah se Premier League-ah erawh substitution pathum chauh an siam thei thung. Season tharah erawh Premier League-ah substitution panga an siam thei tawh ang.