La Liga a ngaihnawm thar - Real leh Barca inlan dawn

Barcelona-in tun hnaiah harhtharna an chan avangin La Liga a ngaihnawm thar a, El Clasico-ah 4-0 a Real Madrid an hneh bawk avangin nomawi thlengin an sawi ri ve leh ta.

La Liga hmahruaitu Real hian Barcelona laka an mualphona aṭangin insiamṭhat an tum a, zanin dar 10:00-ah Celta Vigo an lenchilh dawn - hna awlsam erawh a ni lo ang.

Hetihlai hian en châkawm ber erawh Pathianni zan dar 12:30-a Barcelona leh Sevilla intawng tur hi a ni a, team pahnih hian league nomawi chawi theih an la inbeisei ve ve.

La Liga table-ah Sevilla hi pahnihna an ni mek a, hmahruaitu Real chu point kuain an phak lo mek - Barca hi pathumnaah an awm a, point 12-in an hnufual thung.

Celta beiseina
Real-in insiamṭhat an duh a, mahse, Celta ber kher an tawng dawn - Celta striker chhuanvawr Iago Aspas chuan European football an la beisei thu a sawi a, an beiseina tihlawhtling turin Real hneh a pawimawh.

Aspas chuan, "Real kan mikhual hunah league thawnthu tih ngaihnawm lehzual kan lo tum ang - European football khelh phak kan duh a ni," a ti a, khelh chhan an la nei.

Celta hian point 12-in pangana Real Sociedad an phak lo mek a, La Liga-a pangana hian Europa Conference League playoff round an khel dawn - hei hi Celta-in an la beisei chu a ni.

Liverpool striker hlui Aspas hian tun season-a league match 28 a khelh aṭangin goal 13 a khung tawh a, Santi Mina hian league match 28 aṭangin goal sarih leh assist vawi thum a nei bawk - Real an hneh chuan anmahni mai bakah Sevilla leh Barca an lawm ang.

Benzema a dam
Celta Vigo-in chak ngei an tum a, mahse, a awlsam dawn lo - Real tan Karim Benzema a dam leh tawh a, French striker a awm chuan Madrid khaw club hi team danglam an ni ṭhin.

Kum 34 mi Benzema hian tun season inelna hrang hrangah match 34 khelin goal 32 a khung tawh a, assist vawi 13 a nei tawh bawk.

Celta tan captain leh right back Hugo Mallo chu khup hliam vangin a inlan thei dawn lo a, Benzema telna Real tlarhma hmachhawn tur Celta tan inbuatsaihna ṭha a pawimawh ang.

Hetihlai hian a ke hliam zai vangin Eden Hazard a inlan thei dawn lo a, Isco leh Luka Jovic dinhmun a chiang lo a, he thu buatsaih lai hian Toni Kroos inlan dawn leh dawn loh sawi theih a la ni lo bawk.

Barcelona harhna
El Clasico-a Barca an chak hlimin Xavi a phur a, player a nih lai pawha a thiam bik zinga mi Xavi hian, "Sawi theih engmah a la awm lo," tiin nomawi a la beisei thu a sawi a, Barca an phur thar.

Kum 2022-a league match 10 an khelh tawhah Barca hi an la tlawm miah lo - vawi hnih draw an nei a, vawi riat an chak. League match hnuhnung pangaah phei chuan an chak vek a, goal 18 an khung!

Barca hian Osasuna leh Real chu a zawnin 4-0 ve vein an sawp a, an game mawi bik kan sawi ṭhin kha hmuh turin a awm leh tawh a, Xavi-a'n Barca a chawi nung mek.

Catalan club hian tun hnaiah hliam thar lam sawi tur an nei lo a, January transfer-a an lakluh Pierre-Emerick Aubameyang, Ferran Torres leh Adama Traoré te bawk hi Sevilla tan ven bik ṭul tur an ni.

Sevilla an ṭha
Barca tan January-a an lak thar player-te bakah midfielder duhawm Pedri leh forward Ousmane Dembélé te an khel ṭha ṭhin takzet a, Sevilla tan a harsa dawn.

Mahse, Barca tan Sevilla hi zuam ngawt a fuh lo ang - Julen Lopetegui enkawl team hi champion tum ngam an ni a, Barca laka an tlawm chuan an dinhmun a derthawng thei dawn tih an hria a, thih tha nen an bei ang.

Sevilla hian Barca midfielder hlui Ivan Rakitic, Argentine forward Lucas Ocampos, tun season-a goal 11 khung tawh Rafa Mir leh Argentina international Papu Gómez an nei tih hriat a ṭha.

Tlarhnung lam en ila, Chelsea awh ngawih ngawih Jules Koundé, Argentina left back Marcos Acuña leh centre back Diego Carlos te ho an awm a, Barca hneh turin an ṭha tawk.