IPL club thar Lucknow an chak

Indian Premier League-ah club thar Lucknow Super Giants-in champion lai Chennai Super Kings wicket rukin an hneh. Brabourne Stadium-ah Super Kings-in 210/7 runs tehmeuh siam mah se Super Giants-in ball thum dah bangin 211/4 runs an siam a, hnehna an chang.

Lucknow-in vawm hmasak an thlang. Chennai lamin bul an ṭan ṭha, opener Robin Uthappa-a'n half century (50) a siam bakah Moeen Ali (35), Shivam Dube (49) leh Ambati Rayudu (27) ten an thlawp ṭha. Captain Ravindra Jadeja-a'n ball kua lekah 17 runs a siam a, MS Dhoni-a'n thi loin ball ruk lekah 16 runs a siam bawk.

Target harsa ni mah se dai a tlak avangin batter tan ball vuak a nuam. Lucknow opener KL Rahul (40) leh Quiton de Kock (61) ten bul an ṭan ṭha a, a tawp khartu Evin Lewis chu man of the match-ah an thlang. Kum 30 mi Lewis hian ball 23-ah 55 runs a siam a, Ayush Badoni-a'n ball kuaah 19 runs a siam. Kum 22 mi Delhi tlangval Badoni hi chhinchhiah a ṭha ang, Lucknow tana a match hmasa berah pawh 54 runs a siam.

Vawiin tlai dar 3:30-ah Mumbai Indians leh Rajasthan Royals te an inkhel ang a, zanin dar 7:30-ah Gujarat Titans leh Delhi Capitals te an inhmachhawn ang. April 3, Pathianni zan dar 7:30-ah Chennai Super Kings leh Punjab Super Kings te an inkhel bawk ang.