Aizawl FC aiin Gokulam an ṭha zawk

2nd April, 2022

Aizawl FC-in nizan khan Kalyani Stadium-ah Gokulam Kerala an hmachhawn a, 2-1 in an hneh lo. I League inkhel dangah Sreenidi Deccan-in Kenkre 2-1 in an hneh a, Sreenidi-in hnehna an chan theih nan Durtlang tlangval Lalchungnunga'n freekick aṭangin goal ṭha bik a khung.

Chungnunga Goal

Naihati Stadium-a inkhelah Sreenidi tan Mizo pathum Lalchungnunga, Vanlalbiaa Chhangte leh Lalromawia ten bul an ṭan a, an khingpui Kenkre hi table mawngphaha awm an ni.

Kenkre-in bul an ṭan ṭha zawk a, Ranjeet Pandre
hmangin minute 19-naah an khung. Amaherawhchu Sreenidi-in minute thum hnuah Chungnunga hmangin an sut a, Durtlang tlangval
hian hla tak aṭangin freekicka pet lut.

Sreenidi-in inkhel an thunun a, minute 60-naah
David Castaneda Munoz-a'n chakna goal a khung. Mizo tlangval telna Sreenidi hi point 17 hmuin table-ah pathumnaah an awm mek.

Fiahna patlang lo Aizawl FC-in champion tumin Kolkata an pan a, Covid-19 leh harsatna dang vangin season bul an ṭan fuh lo. Mizo club an insiamṭha chho a, champion nomawi sawi rik ngam ni lo mah se Championship Stage erawh a sawi rik theih.

Yan Law hote hian pahnihna dinhmun luahtu Gokulam Kerala an hmachhawn a, Mizo club tan
fiahna ṭha tak a ni. Inkhelh zawhah Aizawl FC dinhmun a hriat theih a, champion tur chuan an ṭha tawk lo.

Mizo club hian first half-ah ball an chang tam a,
amaherawhchu goal hmaah Gokulam an hlauhawm zawk. Second half ṭantirhah Gokulam Kerala-in na takin an nawr a, Aizawl FC an ṭang zo lo.

Minute 65-naah substitute Sreekuttan-a'n ṭha
taka lalutin kawh zetin goal-ah a pet a, AFC keeper Anuj Kumar-a'n a hna tih tlin loh avangin Jamaican forward Jourdaine Fletcher-a'n goal ruakah a khung. Minute 89-naah Fletcher hian Mizo club
defender-te mutthluk vangin awlsam takin goal hnihna a khung.

Injury time minute nga pek belh a ni a, minute
khatnaah Ayush Chhetri-a'n Aizawl FC tan goal mawi a khung avangin beiseina thar nei mah se Mizo club an chefuh thei lo. Defender Robert Primus chu Fletcher a tihtluk avangin hnawhchhuah a ni a, goal dang erawh a luh belh tawh lo.