Spanish Super Cup Atletico hmaa tlawm Barcelona an mualpho

Spanish Super Cup semifinal aṭangin La Liga champion Barcelona an tla a, a pet chhuaktu chu an hmelma Atletico Madrid an ni. 

Saudi Arabia-a inkhelah Atletico tana Koke goal khung chu Barcelona-in Lionel Messi leh Antoine Griezmann goal hmangin chhanglet mah se Angel Correa chuan goal a rawn khung leh a, 3-2 in Atletico an chak. Barcelona goal khung pahnih chu VAR hmanga ennawn a nih hnuah pawmsak an ni lo ve ve a, Catalan club ṭantuten match official-te thutlukna hi an hrethiam lo khawp ang. 

Atletico hmain Real chuan Valencia hnehin final an lo lut tawh a, Pathianni zan dar 11:30-ah Madrid club pahnihin champion an inchuh dawn - derby ni bawk, final ni bawk kan en dawn tihna a ni. 

King Abdullah Sports City-a inkhelah Atletico Madrid lamin goal an khung hmasa zawk a, Madrid khaw club tan hian Koke chuan first half ṭantirah ṭha zetin a khung. 

Mahse, Barca-in tlawm an tum lo - final-a El Clasico thlentir ngei an tum a, an thiampuipa Lionel Messi leh Atletico 'superstar' ni ṭhin Griezmann hmangin an chhanglet. Atletico an beidawng duh bik lo - winger Vitolo chu Barca keeper Neto chuan penalty area-ah a ti tlu a, Morata chuan harsatna nei loin goal-ah a chantir. 

Minute 86-naah Morata hian Correa goal khung tur a siamsak zui a, Barca tan chhanletna hun a awm tawh lo. Morata chet ropui zanah Barca an tlawm a, nomawi pakhat chu an mangṭha. 

Barcelona-in an vanduaina an thlir a nih chuan video assistant referee vanga an goal khung pahnih pawmsak an ni lo kha ui takin an thlirlet ang a, hriatthiam har an ti ang. 

Team pahnih 1-1 a an inhnehtawk laia Messi goal khung chu VAR rawn a nih hnuah handball vangin pawm a ni lo a, match official lamin Argentine striker hian goal a khung hmain a kutin ball a tawk fuh niah an ngai. Barca-in 2-1 a hma an hruai laiin Gerard Pique chuan a rawn khung ve leh a, Messi freekick aṭanga ball kal Arturo Vidal-a'n Pique tana mawi taka a siamsak hi VAR rawn a nih hnuah offside vangin pawmsak an ni lo. 

Catalan club vanneihna erawh penalty chawitu Neto hnawhchhuah a ni lo kha a ni a, keeper hnawhchhuah ni ngat se Barca hi mualpho thei dinhmunah an ding. 

Kuminah Spanish Super Cup khelh dan an thlak a, season ṭan dawna La Liga leh Copa del Rey champion inelna ni ṭhinah khan champion lai pahnih kan hmu dawn lo!

Copa del Rey champion chu Valencia an ni a, anni hi La Liga lama pathumna Real Madrid chuan 3-1 in an hneh a, Spanish Super Cup an mangṭha. La Liga champion Barcelona-in eng ruai an ang bik lo a, Lionel Messi hoa an khel chungin Atletico Madrid an ngam lo - Spanish Super Cup final-ah a vawi khat nan season hmasaa nomawi chawi nei lo team pahnih an inel dawn!

Spanish Super Cup final hi Pathianni zan dar 11:30-ah khelh a ni dawn a, Real Madrid leh Atletico Madrid ten Jeddah khawpuiah champion nih an inchuh dawn a ni.