India tan Mizo tleirawl an vul ; Germany laka goal khung thei Remsiami
Khawvel huap junior hockey inelna - 2022 Women's FIH Hockey Junior World Cup chu Mizo tleirawlte inlarna hmun a ni! India tan Lalremsiami Hmar-in goal hmahruai a khung a, Lalrindiki'n goal hnih a khung zui bawk.
Tlarhma lamah Mizo tleirawl pahnih an che ṭha a, tlarhnung lama ding Marina Lalramnghaki a khel ṭha bawk. India hian an match hmasa berah Wales 5-1 in an sawp, bul ṭanna duhawm leh duhthusam a ni.
Nimin khan India hian an match hnihna an khel zui a, team ṭha leh champion tura rinkai zinga mi Germany chu 2-1 in an hneh. India goal pakhat zawk hi Remsiami khung a ni a, an elpui lakah an ṭha tawk a ni tih an tarlang.
India hian match hnih aṭangin point ruk an hmu a, khelh hmabak pakhat la nei mah se pool D hmahruaitu niin quarterfinal an lut.
Didiki goal hnih
Inrinnia an match hmasa berah India tan Didiki a vul. Hnahthial tleirawl hian India tana World Cup a khelhna hmasa berah goal hnih a vaw lut a, a goal khung pahnih hi a fin leh thluak hman vang tia sawi theih a ni, a pumrua lian lo mah se khelmual chhungah chuan a lian.
Junior huangah India tan chuan a inlan fo tawh a, goal pawh a khung tawh ṭhin. Didiki tan World Cup goal erawh a hlut dan a danglam a, goal tam zawkin zui se tih chu a duhthusam a ni ngei bawk ang.
Remsiami leh Didiki ang bawka Thenzawl aṭanga inzir chhuak Marina-i pawh tlarhnung lamah a khel ṭha. Rinrawl a nih chhunzawm zel pawh a rinawm. Didiki leh Marina te hian December 2019 khan India junior team hi 3-Nations Tournament-ah pawh an lo champion pui tawh.
Germany hnehtu
Pool D an match hmasa zawkah Germany hian Malaysia 10-0 teh meuhin an sawp a, an tlarhma an hriam bakah a hnung lam an khawng ṭha hle. India tan pawh hmachhawn châkawm lo tak mai an ni.
Mahse, nimin inkhelah India hian goal khung turin an nghah rei a ngai lo. Minute hnihna lekah Mizo nula Remsiami'n buai deuh nuaih karah a vaw goal a, minute 25-naah Mumtaz Khan hmangin goal hnihna an khung bawk - Germany tana Jule Bleuel goal-in awmzia a nei phak tawh lo.
India hian an pool match hnuhnung ber atan April 5, Thawhlehni zan dar 7:00 hian Malaysia an hmachhawn leh dawn. Tling chiang tawh India tan tla fel tawh team hmachhawn hi thil harsa a ni lo tura ngaih a ni.
Thenzawl chhuak
Mizoram khaw tam takin hockey khelh nan an khelmual an remtih loh lai khan Thenzawl chuan hmun an pe phal. A rah chhuah duhawm tak pawh kan hmu mek zel. Remsiami, Didiki leh Marina-i te hi Thenzawl aṭanga inzir chhuak vek an ni.
An naupan laia an coach B. Lalroṭhuami chuan, "India tan rinrawl an ni phak ang," tiin World Cup ṭan hma khan Vanglaini a lo hrilh tawh a, a sawi lawk ang ngeiin match hnih an khelh tawh chinah hmun pawimawh an chang phak.
Infiamna hmunhma neih ṭhat a pawimawh a, hlawhtlinna kailawn pawimawh a ni, chutihrualin talent dawn tipung tura player an thawhrim a ngai, tualchhung coach pawhin khawvel huap inelna hmachhawn turin player an zirtir thei tih a takin kan hmu.