MFA Cup final-ah Aizawl Vs Champhai

GIG Motors 20th MFA Cup final chu vawiin chawhnu dar 1:00 hian khelh a ni dawn a, Aizawl champion leh Kanan FC leh Champhai champion FC Vengthlang North te an inkhel dawn.

Inelna hi Saitual District FA-in Keifang Centenary Football Ground-ah a thleng a, final-ah hian minister R. Lalzirliana chu khuallian a ni dawn. Closing ceremony hi chhun dar 12:00-ah an ṭan ang.

Hei le, Champhai
Champhai hi kum 2017 khan Champhai Bethel hmingin MFA Cup-ah an champion a, tun ṭumah hian nomawi chawi dan hrethiam player panga Mark Ngaihte, Lalramsanga, Lalremruata, Caleba Lalnunhlima leh keeper Lalnunpuia te an la awm.

Team ṭha an ni tih nemngheh nan Champhaiin Lunglei club Chanmari FC 1-0 in an hneh a, goal awmchhun hi Lalsawmzela'n a khung. Semifinal-ah hian Champhai hian goal khat chauh khung mah se inkhel an thunun a, goal tam zawk khung thei tur an ni.

Champhai manager H. Vanlalpeka chuan, "Champhai tih hmingṭhat tumin champion ngei kan tum. Kum 2017 kha kan champion hnuhnun ber a ni a, tun ṭuma champion theihna hun ṭha hi bawhpelh kan tum lo," tiin Vanglaini a hrilh.

Final-ah hian Champhaiin an defender pawimawh Lalchhuanmawia Ralte chu hrem vangin an chhawr thei dawn lo a, channa nasa tak a ni thei ang.

Aizawl aiawh Kanan
Kanan FC-in final lut turin Serchhip Kawnpui 3-1 in an hneh a, inkhelh dan erawh scoreline ang a ni lo. Aizawl champion-in hnehna chang turin vanneihna an mamawh tel.

Coach Chawng-thansanga chuan, "Inpuahchahna hun ṭha kan neih loh avangin kan fitness a ṭha lo a, inkhelh ṭantirh lamah goal khung hma avangin kan vannei. Hun tawp lamah erawh Serchhip goal bawh a na a, kan chak hram a ni," tiin Vanglaini a hrilh a, keeper RS Lalawmzuala leh captain C. Ramdinamawia te a fak tel bawk.

Kanan FC hi squad nei ṭha ber an ni a, amaherawhchu an theihna ang an la lan chhuahtir lo. Chawnga chuan, "Covid-19 vanga kum hnih dawn kan chawlh tawh hnuah club hruaitu te leh veng chhung mi ṭhahnem ngaite vanga football player-te kan pho chhuak leh thei hi ka lawm takzet. Final-a kan khingpui tur Champhai hi team ṭha an ni a, kan intum tawk viau ka ring," tiin Vanglaini a hrilh.

Thlirna Tawi
Semifinal - April 2, Inrinni
FC Vengthlang North 1 - 0 Chanmari FC
FCV : Lalsawmzela 69'

Kanan FC 3 - 1 Serchhip Kawnpui
KFC : K. Roluahpuia 7'; Malsawmdawnga 18'; Vanlalthanga 45+1'
FCS : Felix Lalruatsanga 74'

Final - April 4, Thawhṭanni
FC Vengthlang North 1:00 PM Kanan FC